Polis hücuma məruz qalmış hüquq müdafiəçisinin şikayətini qəbul etmir (YENİLƏNİB)

Polis dünən evinin girişində naməlum şəxsin hücumuna məruz qalmış hüquq müdafiəçisi Günay İsmayılovanın yazılı şikayətini qəbul etməkdən imtina edib.

Nizami rayon 24-cü polis bölməsindən ona bildiriblər ki, dünən onunla söhbət edən əməkdaş bu gün işdə yoxdur.

Xatırladaq ki, bazar ertəsi saat 20.30-da metronun “Neftçilər” stansiyası yaxınlığında İsmayılovanın aşadığı çoxmənzilli evin girişində ona hücum edilib.

28-30 yaşlarındakı kişi onun boğazından tutub, vurmağa çalışıb. İsmayılova onun əlindən qurtarmağa müvəffəq olub və səs-küy salıb, səsə qonşular çıxıb, sui-qəsdçi isə qaçıb.

DİN-in “102” növbətçi xidmətinə zəng etdikdən sonra onların evinə dörd polis əməkdaşı gəlib. Ona yanvarın 27-də ərizə ilə polisə gəlməli olduğunu deyiblər.

İsmayılova hesab edir ki, hücum onun hüquq müdafiə fəaliyyəti ilə bağlı ola bilər. Çünki bu, soyğuna oxşamır və sui-qəsdçi hətta onun əlindən çantanı almağa çalışmayıb.

Günay İsmayılova Reportyorların Azadlığı və Təhlükəsizliyi İnstitutunun direktor müavinidir. Hazırda o, bu institutunun hüquqlarını müdafiə edir.

RATİ ofisi prokurorluq əməkdaşlarının apardığı axtarışdan sonra möhürlənib. İsmayılova digər RATİ əməkdaşları kimi, dəfələrlə istintaqda dindirilib. Prokurorluq onun ölkəni tərk etməsini qadağan edib.

2014-cü ilin oktyabrında o, New York Times-da Azərbaycanda vətəndaş cəmiyyətinin boğulması haqqında tənqidi məqalə dərc edib. -06D-

2015 Yanvar 27 (Bazar ertəsi) 00:12:47

Yanvarın 26-da saat 20.30 radələrində hüquqşünas Günay İsmayılovaya hücum olub.

İsmayılova Turana  bildirib ki, yaşadığı evin blokuna daxil olan zaman 28-30 yaşlarında bir kişi heç bir söz demədən arxadan boğazından tutaraq ona xəsarət yetirməyə cəhd edib. “O mənim boğazımdan yapışdı. Sanki ağzımı tutmağa çalışırdı. Bu zaman cəld arxaya döndüm, onun əlində nə isə var idi. Mən çığırmağa başladım və ayaqlarımla qonşunun qapısını döyəclədim. Bu zaman qonşular çıxdı və o qaçdı. Həmin şəxs bir kəlmə belə danışmadı. Orta boylu idi. Məqsədi soyğunçuluq deyildi. Çünki o mənim çiynimdəki əl çantama toxunmadı. Sadəcə əlində nə isə var idi və məni vurmağa cəhd edirdi”, İsmayılova qeyd edib.

Günay İsmayılova Daxili İşlər Nazirliyinin “102-Qaynar Xətt” Xidmətinə zəng edib. Polislər hadisə yerinə baxış keçirib.

İsmayılovanın bacısı onun cizgilərini təsvir etdiyi kişini yaşadıqları evin qarşısında son günlər bir neçə dəfə gördüyünü deyib. “O hər dəfə yaşadığımız evin eyvanına baxırdı”, İsmayılovanın bacısı qeyd edib.

Günay İsmayılova hüquq müdafiə təşkilatı Reportyorların Azadlıq və Təhlükəsizliyi İnstitutunun (RATİ) direktor müavini olub. Hazırda bu institutun hüquqlarını müdafiə edir.

RATİ-nin ofisi 2014-cü ildə axtarış aparıldıqdan sonra prokurorluq tərəfindən möhürlənib. İnstitutun çoxsaylı əməkdaşları istintaq orqanında dindirilib.

Hadisə ilə bağlı rəsmi qurumlar hələ münasibət bildirməyib.