“Qarabağ yürüşü” ilə bağlı iş üzrə üçüncü qrupun məhkəməsi

Bakı/09.03.21/Turan: Bu gün, martın 9-da Azərbaycan Ordusuna dəstək məqsədi ilə 2020-ci il iyulun 14-də keçirilən aksiya zamanı yaranmış insident faktı üzrə həbs edilən şəxslərin cinayət işi üzrə təqsirləndirlən 12 nəfərin (üçüncü qrup) cinayət işi üzrə məhkəmə prosesi davam edib.

Bugünki məhkəmə iclası hakim Ülviyyə Şükürovanın sədrliyi ilə Səbail rayon Məhkəməsinin binasında keçirilib.

Bu qrupda 12 nəfər məhkəmə qarşısına çıxarılıb. Onlardan 6 nəfəri - Telman Seyfullayev, İsmayıl Həsənov, Baba Süleyman, Məhəbbət Nağıyev, Ceyhun Novruzov, Gündüz Mirzəyev Azərbaycan Xalq Cəbhəsi Partiyasının fəallarıdır.

Bu cinayət işi üzrə ümumilikdə 37 nəfər təqsirləndirilən, 22 nəfər zərərçəkən şəxs var.

Təqsirləndirlən şəxslərdən 16 nəfəri Azərbaycan Xalq Cəbhəsi Partiyasının, 2 nəfəri Müsəlman Birliyi Hərəkatının, 1 nəfəri Azərbaycan Demokratiya və Rifah Hərəkatının fəalıdır. Təqsirləndirilənlər arasında Naxçıvanın keçmiş daxili işlər naziri Siyavuş Mustafayev də var. Qalanları isə bitərəflərdir.

2020-ci il iyulun 14-də Bakıda minlərlə insanın Ermənistan-Azərbaycan sərhədində gedən döyüşlərə dəstək məqsədilə keçirdiyi yürüş-mitinq iyulun 15-də səhərə yaxın polis tərəfindən dağıdılıb. Aksiyanın dağıdılması zamanı polis su şırnaqlarından, gözyaşardıcı qazdan və dəyənəklərdən istifadə edib.

Gecə saatlarında bir qrup aksiya iştirakçısı parlamentin binasına daxil olub, polis avtomobili aşırılıb. Bu zaman polis aksiya iştirakçılarını parlamentin binasından çıxarıb və polislə qarşıdurma yaşanıb.

Yaranmış insidentlə bağlı cinayət işi qaldırılıb, çoxsaylı insan həbs edilib.

Rəsmi qurumlar həbs edilənlərin sayı barədə məlumat verməsə də, hüquq müdafiəçiləri onların sayının yüzdən çox olduğunu güman edir. Onların çoxu inzibati qaydada cəzalandırılıb.

Azərbaycan Xalq Cəbhəsi Partiyasının məlumatına görə, Azərbaycan Ordusunu dəstəkləmək məqsədi ilə iyulun 14-də keçirilən aksiya zamanı yaranan insident faktı ilə bağlı qaldırılmış cinayət işi üzrə bu partiyanın 45 nəfər fəalı həbs edilib.

“Onlardan 16 nəfərinə qarşı ağır ittihamlar irəli sürülüb. 15 nəfər inzibati qaydada həbs edilib, 14 nəfər şahid qismində dindirilərək sərbəst buraxılıb”, deyə məlumatda qeyd edilir.

Azərbaycan Xalq Cəbhəsi Partiyası və digər bir sıra siyasi qurumlar həbsləri “siyasi sifariş” hesab edir.

Təqsirləndirilən şəxslər Cinayət Məcəlləsinin 186 (əmlakı qəsdən məhvetmə və ya zədələmə), 233 (ictimai qaydanın pozulmasına səbəb olan hərəkətlər təşkil etmə ) və 315-ci (hakimiyyət nümayəndəsinə zor tətbiq etmə) maddələri ilə ittiham olunur.

Ötən ilin noyabr-dekabr aylarında həbsdə saxlanılanların hamısı polisin nəzarətinə verilməklə sərbəst buraxılıb.

Bu gün Səbail rayon Məhkəməsində keçirilən məhkəmə iclasında ittiham aktı elan edilib və təqsirləndirlən şəxslər sərbəst ifadə verməyə başlayıb.

Təqsirləndirilən şəxslər ittihamı qəbul etmədiklərini və işin siyasi sifariş olduğunu bildiriblər.

Azərbaycan Xalq Cəbhəsi Partiyasının fəalı Telman Seyfullayev bildirib ki, o, aksiyada iştirak edib, lakin hər hansı zorakı hərəkətdə iştirak etməyib.

“Bu gün də Azərbaycan Ordusunu dəstək məqsədi ilə aksiya keçirilsə, iştirak edəcəyəm.  Akasiyada mən Müdafiə Nazirliyinin keçmiş baş qərargah rəisinin ietefasını tələb etmişəm. Məgər, kiminsə istefasını tələb etmək cinayətdir?”, deyə o sual edib.

Məhkəmə iclası təqsirləndirilən şəxslərin sərbəst ifadələri ilə davam etdirilir. -03C-