Qarabağda insident Azərbaycanda antirusiya əhval-ruhiyyəsinə səbəb olub

Bakı/28.12.20/Turan: Dekabrın 27-də Xocavənd rayonunda bir azərbaycanlı və altı erməni hərbçinin həlak olması ilə nəticələnən erməni təxribatçı qrupun Azərbaycan hərbçilərinə hücumu ölkənin ekspert cameəsində Rusiyanın ünvanına yeni tənqidlərə səbəb olub.

Azərbaycan Müdafiə Nazirliyi insident haqda məlumatı Ermənistana xəbərdarlıq etməklə başa çatdırıb. Prezident İlham Əliyevin işğaldan azad edilmiş Qubadlıya səfəri ərəfəsində analoji bəyanatını təkrarlayaraq belə insidentlərin təkrar olunacağı təqdirdə ən sərt tədbirlərə əl atılacağını vəd edib.

Azərbaycanın ekspert cameəsi isə baş vermiş hadisədə atəşkəsin dəstəklənməsi missiyasını öz üzərinə götürmüş Rusiyanı ittiham edir.

Xalq Cəbhəsi Partiyasının sədri Əli Kərimli öz bəyanatında Hadrut və Şuşaya hərbi təhlükənin olması  və Rusiya sülhməramlılarının erməni terrorçularına yardım etməsi ilə bağlı xəbərdarlıqlarını xatırladır. Ə.Kərimli sülhməramlılardan imtina etməyə çağırır: "Bizim ordumuz azərbaycanlı əsgərin qatillərini özü cəzalandırmağa qadirdir".

İki gün öncə qeyri-rəsmi mənbələr Qarabağa iki kolon erməni əsgərin gəldiyini bildiriblər. Avtobuslar Gorus yolunda növbə çəkən Rusiya sülhməramlıları tərəfindən buraxılıb. Rusiya KİV-in məqaləsində isə sülhməramlıların ermənilərin avtomobillərini yoxlaması proseduru təsvir edilib: sülhməramlılar sərnişin oturacağında avtomatı görürlər, silahın qeydiyyatının olması barədə soruşurlar və buraxırlar.

Politoloq Elxan Şahinoğlu Facebook-da qısa status yerləşdirərək RF sülhməramlılarını erməni terrorçuların himayədarı adlandırıb.

REAL Partiyasının sədri İlqar Məmmədov Facebook-da Moskvanın qarşısında şərt qoymağı təklif edir: sülhməramlıların sayı azərbaycanlı hərbçilər həlak olduqca azalmalıdır. Əgər bizim əsgərimiz, yaxud zabitimiz həlak olubsa Qarabağda sülhməramlıların sayı 200 nəfərdən az olacaq. İki nəfər ölübsə sülhməramlının sayı 500-dən az olacaq. Üç nəfərin ölümünə görə Rusiya Azərbaycandan 1000 nəfər öz adamını çıxarmalıdır. Onda Moskva ermənilərə bir saniyədə ağıl öyrədəcək", - siyasətçi yazır.

"Əgər belə tələb olmasa və “DQR”in əski parçası (bayraq-red.) Rusiya Müdafiə Nazirliyinin saytında olacaqsa, o zaman düşmən bizim hərbçilərimizə atəş açmaqda davam edəcək, şəhidlərimiz olacaq", - İ.Məmmədov bildirib.

İqtisadiyyat professoru Qubad İbadoğlu öz statusunda diqqəti Qarabağda müharibənin dayandırılmasına dair bəyanatın dördüncü bəndinin Rusiya tərəfindən pozulmasına yönəldir. Həmin bənddə Rusiya erməni ordusu regiondan çıxdıqca öz qoşunlarını yerləşdirmək öhdəliyi götürmüşdü.   Amma rus sülhməramlılar erməni silahlılarını bizim ərazilərdə yerləşdirmək və onları silah-sursatla təmin etməklə məşğuldur. Rusiyadan başqa gözləntilərim yox idi. Gözləntilərim Azərbaycan hakimiyyətindən və xalqdandır. Hakimiyyət, xalqın ziyalıları susur. Ara-sıra danışanları da trollar vasitəsilə susdurmağa çalışırlar. Biz susmamalıyıq,  problemlərin həllinə çalışmalıyıq”, - Q.İbadoğlu yazır.

Deputat və politoloq Rasim Musabəyov KİV-ə müsahibəsində Azərbaycanı rahatlanmamağa çağırır. "Ordunu gücləndirməyə, onun döyüş qabiliyyətini yüksəltməyə və ayıq olmağa davam etmək lazımdır. Hər halda, Ermənistanda dövlət ideologiyası dəyişənə qədər belə olmalıdır.

“Dövlət başçısı çox düzgün qeyd etdi ki, bir neçə ildən sonra erməni faşizminin yenidən baş qaldırmayacağına heç kim zəmanət verə bilməz. Ona görə də Azərbaycan dövləti həmişə güclü olmalıdır", - deputat vurğulayıb.—0--