Qazaxda AXCP fəalının evini sökmək istəyirlər

Bakı/10.11.17/Turan: Xalq Cəbhəsi Partiyasının Qazax rayon təşkilatının fəalı Fəzail Əliyev ona qarşı təzyiqin gücləndiyini bildirib.

Bunun səbəbi oktyabrın 27-də Bakıda Demokratik Qüvvələrin Milli Şurasının mitinqində iştirakıdır.

"Rayon mərkəzində dayım oğlunun çayxanasını, bacım qızına məxsus kommersiya obyektini bağlayıblar. Bu günlərdə rayon icra hakimiyyətindən məktub gəlib ki, tikintisi hələ başa çatmamış evim söküləcək və səbəb də budur ki, guya həmin tikili yüksəkgərginlikli elektrik xəttinin qoruq zonasında yerləşir. Halbuki bu evin cəmi birmərtəbəsi tikilib, özü də bunu gizlin tikməmişəm ki hamı görür, o zaman bu sözü niyə demirdilər?", deyə Əliyev bildirib.

O hesab edir ki, siyasi motivlərlə təzyiqə məruz qoyulur.

Əliyev 1980-ci illərin sonlarında və 1990-cı illərin əvvəllərində milli-demokratik hərəkatda iştirak edib, həmçinin Qazax rayonunun müdafiəsi üzrə döyüş əməliyyatlarında fəal iştirak edib. -06D-