Qəbələdə toyda kütləvi zəhərlənmə olduğu bildirilir (Yenilənib)

Baş Prokurorluğun Mətbuat xidməti bildirib ki, avqustun 15-də Qəbələ şəhərində yerləşən şadlıq evlərindən birində keçirilən toy mərasimində iştirak edən şəxslərdən 55-nin qida zəhərlənməsi şübhəsilə xəstəxanaya müraciət etməsi faktı ilə bağlı Qəbələ rayon prokurorluğunda araşdırma aparılır.

Zəhərlənmənin səbəbinin müəyyənləşdirilməsi məqsədilə prokurorluq əməkdaşları tərəfindən Azərbaycan Respublikasının Qida Təhlükəsizliyi Agentliyi əməkdaşlarının iştirakı ilə şadlıq evindəki qidalardan nümunələr götürülərək müvafiq ekspertizalar təyin edilib və digər zəruri prosessual hərəkətlər icra olunub.

* * *

Qəbələ rayonunda toyda kütləvi zəhərlənmə olub. Azərbaycan Respublikasının Qida Təhlükəsizliyi Agentliyi bildirib ki, Qəbələdə baş verən zəhərlənmə hadisəsinin səbəbləri, həmçinin qida zəhərlənməsi olub-olmaması ilə bağlı agentliyin mütəxəssisləri ilə müvafiq qurumların əməkdaşları tərəfindən araşdırmalara başlanılıb.

Xatırladaq ki, son günlər Azərbaycanda qida zəhərlənmələri çoxalmaqdadır. Belə ki, bir neçə gün öncə Göygöl rayonunda və Gəncədə 150-dən çox insan qida zəhərlənəsindən xəstəxanalara müraciət edib.