Qədir-Xum: Peyğəmbər canişin təyin etdi

Dini Qurumlarla İş üzrə Dövlət Komitəsinin (DQİDK) sədri Elşad İsgəndərov Qədir-Xum bayramı münasibətilə Azərbaycanın şiə müsəlmanlarını təbrik edib. 

Komitə sədri bütün Əhli-beyt sevənləri Nəbəvi vəsiyyəti - rəmzi Qədr-Xum bayramı münasibətilə təbrik edir, Əhli-beyt eşqinin ümmətin birləşdirilməsi və hər iki anlamda xeyirlərə vəsilə olmasını təmənna etdiyini bildirir. 

Qədir-Xum şiələrin böyük bayramlarından biridir və hər il zilhiccə ayının 18-də qeyd edilir. Qədir-Xum Məkkə-Mədinə arasında yerləşən, Cöhfə yaxınlığında bir diyarın adıdır. Məkkədən iki yüz kilometr məsafədə yerləşir. “Qədir” isə ərəb dilində müxtəlif ölkələrin hacılarının bir-birindən ayrılacağı dörd yol deməkdir.

Şimal istiqamətində yol Mədinəyə, şərq istiqamətində İraqa, qərb istiqamətində Misirə, cənub istiqamətində Yəmənə gedir. Hal-hazırda “Qədir-Xum” diyarı tərk olunmuş bir yerdir. 

Amma bir zamanlar İslam tarixinin ən böyük hadisələrindən birinin şahidi olub. O hadisə Məhəmməd peyğəmbərin (s) Əli ibn Əbu Talibi canişin təyin etməsi idi. Xəlifələr siyasi səbəblər üzündən bu böyük tarixi hadisəni xatirələrdən silmək istəyiblər. 

Bir çox qüvvələr bu hadisəni məhv etmək, əhəmiyyətsiz qələmə vermək istəsələr də, hadisənin tarixi, hədis və ərəb ədəbiyyatında ifa etdiyi geniş rolu onu məxfi saxlamağı, yaxud tarix səhifəsindən silməyə heç cür imkan vermir. -05B-