Qeyri-Hökumət Təşkilatları Koalisiyası onun ekspertlərinin Söyüdlüdəki qızıl müəssisəsinin monitorinqinə buraxılmasına çağırır

Bakı/06.07.23/Turan: 90-a yaxın ictimai birliyi birləşdirən "Mədən sənayesində şəffaflığın artırılması" üzrə QHT Koalisiyası Söyüdlü kəndindəki ekoloji vəziyyətlə bağlı Azərbaycanın ekologiya və təbii sərvətlər naziri Muxtar Babayevə müraciət edib.

Müraciətdə Söyüdlüdə yerləşən qızıl emalı zavodunda əmələ gələn kimyəvi tullantıların axıdılması üçün 45 hektar ərazidə ikinci süni gölün yaradılması ilə bağlı narahatlıq ifadə olunub.

Müraciətdə xatırladılır ki, yerli sakinlər zəhərli kimyəvi maddələrin müəssisədən əvvəllər yaradılmış süni gölə atılmasına etiraz olaraq etiraz aksiyası keçiriblər. Belə ki, bu göl adamların sağlamlığına və ətraf mühitə mənfi təsir göstərir.

Lakin yerli sakinlərin etirazı polisin həddindən artıq güc tətbiq etməsilə, o cümlədən yaşlı qadınlara qarşı, sərt şəkildə yatırılıb.

Bu hadisələrlə əlaqədar yerli sakinlər arasında həbslər aparılıb, kəndin girişində isə adamların, o cümlədən müstəqil jurnalistlərin və fəalların Söyüdlüyə buraxılmasını məhdudlaşdırmaq məqsədilə polis postları qoyulub.

Müraciətdə xatırladılır ki, Söyüdlüdə vəziyyətin öyrənilməsilə əlaqədar  iyunun 21-də Babayevin rəhbərliyilə hökumət komissiyası yaradılıb və artıq nazir aparılmış tədqiqatların ilkin nəticələrini KİV-də paylaşıb.

Müraciət müəllifləri onu da xatırladırlar ki, bundan öncə də hasilat sahələrinin mövcud olduğu regionlarda, o cümlədən azad edilmiş ərazilərdə real vəziyyətin və istehsalın ətraf mühitə təsirinin qiymətləndirilməsi üçün koalisiyaya monitorinqlər aparmaq imkanlarının yaradılmas xahişilə Ekologiya və Təbii Nazirliyinə müraciət ediblər.

Lakin bu müraciətlər nəzərə alınmayıb.

İndiki vəziyyətdə koalisiya beynəlxalq praktikada qəbul edilmiş ətraf mühitə təsirlərin alternativ qiymətləndirilməsinin hazırlanması üçün müstəqil vətəndaş cəmiyyəti institutlarının nümayəndələrinin iştirakı ilə Söyüdlü müəssisəsində istehsalın vəziyyətinin qiymətləndirilməsini zəruri hesab edir.

"Müstəqil vətəndaş cəmiyyətinin bu prosesdə iştirakı yerli icmanın etimadına və ümumilikdə Azərbaycanın müsbət imicinə töhfə verəcək, vətəndaşların dövlətimizə inamını artıracaq", - müraciətdə qeyd olunub. 06B