QMİ hüzrlərin sadə şəkildə keçirilməsi üçün şəxsi nümunəni vacib sayır

Qafqaz Müsəlmanları İdarəsi (QMİ) olaraq biz ehsanın yox, israfın həmişə əleyhinə olmuşuq. Bunu Turan-a QMİ rəsmisi bildirib.

QMİ rəsmisinə görə, inzibati üsullarla hüzr məclislərində qayda-qanun yaratmaq mümkün deyil. Bunun yeganə çıxış yolu maarifləndirmə işini gücləndirməkdədir.

Digər tərəfdən, insanların ehsan anlayışı haqqında təsəvvürləri də səhvdir. “Ehsan etmək təkcə yemək deyil, bütün xeyirxah əməllərin hamısı ehsandır”, - deyə QMİ rəsmisi qeyd edib.

Ehsan etməklə bağlı “Quran-i-Kərim”in 21 ayəsində “ehsan” kəlməsinin əksini tapdığını deyən mənbə QMİ-nin “Quran” əmrinin əleyhinə çıxa bilməsinin mümkünsüz olduğunu nəzərə çatdırıb. İsrafa qarşı mübarizəyə gəlincə, QMİ-nin hələ 2011-ci ilin yayında bu mövzu ilə bağlı bəyanatla çıxış etdiyi xatırladılıb. Adı çəkilən sənəddə təkcə hüzr məclislərində yox, həm də toy məclislərində israfın qarşısının alınması zərurəti əksini tapıb.

Odur ki, QMİ rəsmisi bəzi yerlərdə ehsan qadağasının QMİ-nin adı ilə bağlanmasına, hətta bununla bağlı QMİ-nin fətvası olması haqda şayiələrə etiraz ifadə edib. “Biz ictimai qurum olaraq israfın qarşısının alınması üçün tövsiyələr vermişik, ehsanın qadağan olunması ilə bağlı yox”, deyə QMİ təmsilçisi mövqeyini ifadə edib. Həm də yaxın bir-iki gündə QMİ-nin ehsanla bağlı sənədlə çıxış edəcəyi qeyd olunub.

QMİ təmsilçisi hüzr məclislərində israfa qarşı mübarizə məsələsinin daha çox müzakirə mövzusu olduğu haqlda toylarda israfa qarşı mübarizə məsələsinin tamamilə kənara qoyulduğunu, yada düşmədiyini vurğulayıb. “Hüzr məclislərində, demək olar ki, israf olmur, istifadə olunmayan yeməklər qonum-qonşuya, qohum-əqrəbaya paylanır, uşaqlar, qocalar evinə verilir. Toylarda isə bir toydan qalan yeməklər başqa bir toy məclisinə yeni ərzaq kimi “transfer” edilir, amma, buna baxmayaraq, bu israf geniş müzakirə obyekti olmur”, - deyə QMİ təmsilçisi bildirib.

Hüzr məclislərinin sadə şəkildə keçirilməsi üçün əsas vasitərlədən biri nümunə göstərməkdir. “Hüzr məclislərinin sadə keçirilməsi haqda fikir, düşüncə var, amma buna nümunə göstərmək istəyən yoxdur. Odur ki, burada kimin hansı təbəqəyə aid olmasına baxmayaraq, şəxsi nümunə göstərmək vacibdir”, - deyə QMİ rəsmisi bildirib. -05B-