QMİ sədri xalqa Novruz təbriki ünvanlayıb

Qafqaz Müsəlmanları İdarəsinin (QMİ) sədri seyxulislam Allahşükür Paşazadə Novruz bayramı münasibətilə Azərbaycan xalqına təbrik ünvanlayıb.

A.Paşazadə xalqı qədim və gözəl Novruz münasibətilə təbrik edib, hamıya Allah-Təaladan səadət, rifah, bol bayram sevinci diləyib.     

QMİ sədri Novruz bayramının xalqın tarixində özəl yeri və önəmi olan xalq bayramı adlandırır. A.Paşazadə Novruz bayramını Allahın böyük lütfü kimi dəyərləndirir. Bu bayramın Yer üzünə təravət, yeni ab-hava, torpağa yeni həyat bəxş etdiyini nəzərə çatdırır.

QMİ sədri qeyd edib ki, bu bayramın dini baxımdan önəm kəsb edən məqamlarla üst-üstə düşməsi Novruzun mübarəkliyi və ülviliyini daha da artırır. A.Paşazadə bəşərin tövhidə (təkallahlılıq) gəlməsində önəmli məqam olan Mühəmməd Peyğəmbərə gələn ilk vəhyin bu bayrama təsadüf etməsini Novruzun ilahi səciyyəsi adlandırır.

“Allaha çox şükürlər olsun ki, xalqımız ildən-ilə Novruza daha böyük inamla qədəm qoyur, bu bayram dövlət və millətin inkişafına rəvac verir, Qarabağda qələbə əzmimizi daha da artırır”,- A.Paşazadə vurğulayıb.

QMİ sədri təbrikin sonunda bu el bayramı münasibətilə xalqı bir daha təbrik edib, hər bir ailəyə səadət, xoş ovqat arzulayıb.-05D-