Bakı və Kabul BTQ vasitəsilə yük daşınmasını müzakirə edir

Əfqanıstan Bakı-Tbilisi-Qars dəmiryol marşrutundan istifadədə maraqlıdır. Bu barədə martın 18-də Bakıda Azərbaycan və Əfqanıstan XİN rəhbərləri – Elmar Məmmədyarov və Zərar Əhməd Osmanın birgə mətbuat konfransında bildirilib.

Nazirlər bildiriblər ki, hazırda bu məsələlər Türkmənistanla da müzakirə olunur. Əfqanıstandan yük Azərbaycana və oradan Gürcüstan və Türkiyəyə göndərilməsi üçün Türkmənistan ərazisindən keçir.

Məmmədyarovun sözlərinə görə, NATO ilə də müvafiq danışıqlar aparılır, anti-terror əməliyyatı başa çatdıqdan sonra Əfqanıstandan sözügedən dəmir yolu ilə yüklərin daşınması müzakirə olunur.

Əfqanıstan naziri bildirib ki, bu məsələləri artıq Gürcüstanda və Türkiyədə müzakirə edib.

Xatırladaq ki, BTQ-nin 2014-cü ilin sonlarında istismara verilməsi nəzərdə tutulur.

Məmmədyarov bildirib ki, Azərbaycan koalisiya qüvvələri çıxarıldıqdan sonra da Əfqanıstana yardımı davam etdirəcək.

“Əfqanıstanda ANAMA minaların təmizlənməsi üzrə milli agentliyin mütəxəssisləri işləyir. Əfqan mütəxəssislər Azərbaycan diplomatiya, polis və digər akademiyalarda təhsil alır.

Azərbaycan Əfqanıstana enerji yardımı da göstərməyə hazırdır. İkitərəfli iqtisadi komissiyanın yaradılması haqqında razılaşmalar əldə olunub”, deyə o bildirib.

Osman Azərbaycanın terrorizmə qarşı mübarizəyə verdiyi töhfəni yüksək qiymətləndirərək, Əfqanıstandakı əməliyyatda 90 Azərbaycan hərbiçisinin iştirak etdiyini xatırladıb.

O, minnətdarlıqla qeyd edib ki, Azərbaycanın köməyi 2015-ci ildən sonra da davam etdiriləcək. Osman iki ölkə arasında təhsil, investisiya, maliyyə sahələrində əməkdaşlığın inkişaf etdiyini qeyd edir. -06D-