Quba hadisələri üzrə ittiham olunanların məhkəməsi qapalı keçirilir?

1 mart Quba hadisələri üzrə bugünkü məhkəmə prosesində hakim Zamin Tahirov yerli jurnalist Cəmil Məmmədlini və Helsinki Vətəndaş Assambleyası Azərbaycan Milli Komitəsinin (HVAAMK) regional nümayəndəsi Avtandil Məmmədlini zaldan çıxarıb.  

Hakim öz hərəkətini onunla əsaslandırıb ki, jurnalist və hüquq müdafiəçisi dünənki məhkəmə iclası barədə KİV-ə məlumat veriblər.

“Artıq zalda jurnalist, hüquq  müdafiəçisi və ATƏT nümayəndəsi olmadığından faktiki olaraq məhkəmə qapalı keçirilir”, - A.Məmmədli Turan-a bildirib.

Müttəhimlər kürsüsündə hadisələrin 8 iştirakçısı əyləşib. 

Müttəhimlərə CM-in 186.2.2 (başqasının əmlakını yandırma yolu ilə məhv etmə və ya zədələmə ağır nəticələrə gətirib çıxardıqda), 233 (ictimai asayişin pozulmasına yönəlmiş əməllərin təşkili və ya onlarda fəal iştirak) və 315.1-ci (hakimiyyət nümayəndəsinə müqavimət göstərmə və ya ona qarşı güc tətbiq etmə) maddələri ilə ittiham irəli sürülüb. Təqsirləri sübuta yetirilərsə, onları 7 ilədək həbs cəzası gözləyir. -06B-