RATİ hakimiyyəti jurnalistlərin həbsinə son qoymağa çağırıb

Bakı/20.06.19/Turan: Reportyorların Azadlığı və Təhlükəsizliyi İnstitutu (RATİ) jurnalistlər İkram Rəhimov və Polad Aslanovun siyasi səbəbli həbsinə görə Azərbaycan hakimiyyətini qınayır, hakimiyyəti söz azadlığına təzyiqi dayandırmağa və peşə fəaliyyətinə görə həbsdə olan bütün KİV nümayəndələrini azad etməyə çağırır.

RATİ Dövlət Təhlükəsizliyi Xidmətinin realliq.info saytının baş redaktoru İkram Rəhimovun 5,5 il müddətinə həbs edilməsində, həmçinin xeberman.com və press-az.com saytlarının təsisçisi Polad Aslanovun dövlətə xəyanət ittihamı ilə saxlanılmasında əli olduğunu bildirib.

"Azərbaycanın aparıcı xüsusi xidmət orqanının jurnalisti aşkar qurama hədə-qorxu yolu ilə tələb etmə ittihamı ilə həbs etməsi faktı bir çox suallar yaradır, niyə terror və dövlət təhlükəsizliyinə yönələn digər ciddi cinayətlərlə mübarizə aparmalı olan nazirlik ona aid olmayan məsələyə görə jurnalistin həbsinə cəlb edilir", - bəyanatda deyilir.

Jurnalist Polad Aslanovun uydurma dövlətə xəyanət ittihamı ilə həbsi daha çox sual yaradır.

"Ölkədə gərgin sosial iqtisadi və siyasi vəziyyət fonunda Azərbaycan hakimiyyəti arzuedilməyən KİV nümayəndələrinə onları nüfuzdan salmaqla və həbs etməklə hücumları davam etdirir",- bəyanatda qeyd olunur.

Hakimiyyətin elan etdiyi islahatlar kursu Aİ və Azərbaycan arasında əməkdaşlıq haqqında müqavilənin imzalanması ərəfəsində beynəlxalq birliyi çaşdırmaqdan başqa bir şey deyil.

RATİ hakimiyyəti saxlanılan və həbsdə olan bütün jurnalistləri, o cümlədən Əfqan Muxtarlı, Seymur Həzi, Elçin İsmayıllı, Ziya Əsədli, Araz Quliyev, İkram Rəhimov və Polad Aslanovu dərhal azad etməyə çağırır.

RATİ Azərbaycanıın Qərb tərəfdaşlarını hakimiyyətin ifadə azadlığına yeni hücumlarını pisləməyə çağırıb.-06D-