REAL 1 noyabr parlament seçkilərinin nəticələrini tanımayacaq

REAL Hərəkatı 1 noyabr parlament seçkilərinin nəticələrini tanımayacağını bəyan edib. Hərəkatın bəyanatında deyilir ki, xalqın öz iradəsini azad ifadə etməsi üçün normal atmosferin və imkanların olmadığı bir şəraitdə seçki kampaniyasında iştirak etmək vətəndaşlarla ünsiyyət üçün imkanlardan istifadə məqsədi daşıyıb.

REAL Hərəkatı adından 17 nəfər öz namizədliyini irəli sürüb və onların xeyrinə 10 min imza toplanıb.

REAL namizədlərinin qeydiyyata alındıqları 10 dairədə 400-500 min adam yaşayır. 22 günlük seçkiqabağı təşviqat dövründə Hərəkat bütün gücünü vətəndaşlarla görüşə həsr edib. Hərəkat nümayəndələri demək olar ki, evlərə gedərək seçiciləri təşkilat, onun məqsəd və proqramı, REAL hərəkatının lideri İlqar Məmmədovun qanunsuz həbsi barədə məlumatlandırıblar.

Kampaniya ərzində 120 min çap təşviqat materialı paylanılıb.

REAL hesab edir ki, əhalini özü haqda məlumatlandırmaqla məqsədinə çatıb.

Lakin normal atmosferin olmadığını nəzərə alan REAL bildirir ki, seçkilərin nəticələri xalqın real seçimini əks etdirməyəcək.

“Ölkədə seçki institutunun məhv edilməsinə görə məsuliyyət hakimiyyətin üzərinə düşür”, - bəyanatda deyilir.

REAL  siyasi məhbuslar azadlığa buraxıldıqdan, azad siyasi rəqabət üçün şərait yaradıldıqdan, qeydiyyata alınmış namizədin hər birinə pulsuz efir vaxt ayrıldıqdan sonra 2016-cı  ildə təkrar seçkilərin keçirilməsini tələb edir.

Eyni zamanda REAL əhalini öz hüquqları uğrunda mübarizə aparmağa, seçkiyə gedərək saxtakarlığa “yox” deməyə, seçki zamanı pozuntular barədə Hərəkatın seçki qərargahına məlumat verməyə çağırır.

Hərəkatın icraçı katibi Natiq Cəfərli Turan-a bildirib ki, Hərəkat öz namizədlərini geri çağırmır. “Hərəkatın bəyanatında bizim seçkilərə verdiyimiz siyasi qiymət əksini tapıb. Hüquqi qiymət bütün ölkə boyunca 400-ə yaxın müşahidəçinin rəyi nəzərə alınmaqla səsvermədən sonra veriləcək”, - o qeyd edib.  –06D-