ReAl fəalları 7 gün inzibati həbs cəzasına məhkum edilib (yenilənib)

Axşama yaxın Səbail rayon məhkəməsi ReAl-ın digər fəalı Elşən Qasımovu da polisə tabe olmamaq ittihamı ilə 7 gün müddətinə inzibati həbs cəzasına məhkum edib.

Vəkil Elçin Sadıqovun Turan-a verdiyi məlumata görə, gənc  inzibati protokol tərtib edilərkən təzyiq göstərildiyini bildirib.

Hər iki fəalın həbsi haqqında məhkəmə qərarlarından Apellyasiya Məhkəməsinə şikayət veriləcək.

2016 Avqust 16 (Çərşənbə axşamı) 11:39:18

 Bu gün Səbayel Rayon Məhkəməsi REAL Hərəkatının fəalı Toğrul İsmayılovu inzibati qaydada 7 sutkalığa  həbs edib. Bu gün digər fəal Elşən Qasımov da məhkəmə qarşısında dayanacaq.

Bu barədə Turan-a REAL İdarə Heyətinin üzvü Azər Qasımlı bildirib.

T.İsmayılov polisin qanuni tələblərinə tabe olmamaqda təqsirli bilinib.

Gənclər ötən gün axşam “İçərişəhər” metro stansiyasının yaxınlığında mülki geyimli şəxslər tərəfindən saxlanılıblar.

Onlar həbsdə olan REAL lideri İlqar Məmmədovun təşviqat materiallarını mətbəələrin birindən götürməyə gedərkən saxlanılıblar.

T.İsmayılov və E.Qasımov  Konstitusiyaya düzəlişlərin əleyhinə təşviqat məqsədilə yaradılmış REAL təşəbbüs qrupunun səlahiyyətli nümayəndələridir.

REAL Hərəkatı həbsi siyasi motivli hesab edir.

Avqustun 12-də REAL Hərəkatının icraçı katibi Natiq Cəfərli də həbs edilib.-16D-

2016 Avqust 15 (Bazar ertəsi) 23:20:35

REAL (Respublikaçı alternativ) hərəkatının üzvləri Elşən Qasımovla Toğrul İsmayılovu kimliyi bəlli olmayan şəxslərin saxladığı bildirilir.

Bu haqda hərəkatın idarə heyətinin üzvü Rəsul Cəfərov saxlananların yaxınlarına istinadən məlumat verib.

Onun bildirdiyinə görə, Elşən Qasımovla Toğrul İsmayılovu avqustun 15-də metronun “İçərişəhər” stansiyasının yaxınlığında saxlayıblar. Gəncləri saxlayan şəxslər mülki geyimdə olublar.

REAL-çıların hara aparıldığı bəlli deyil. Ancaq onların hansısa idarədə sorğu-sual edildiyi guman edilir. Rəsul Cəfərovun bildirməsinə görə, bu haqda Elşən Qasımov telefonla qardaşına məlumat verib və telefonu söndürməli olduğunu deyib.

Amma hələlik gənclərin yerini müəyyənləşdirmək mümkün olmur. Vəkil Elçin Sadlqov qeyd edir ki, Bakı şəhər Baş Polis İdarəsinə, Nərimanov, Səbail, Xətai rayonlarının polis idarələrinə baş çəkiblər, hər yerdən gənclərin orada olmadığını bildiriblər.

Hazırda vəkil və REAL-ın fəalları Bakıda hüquq-mühafizə orqanlarında gəncləri axtarmaqla məşğuldurlar.

Elşən Qasımovla Toğrul İsmayılov REAL hərəkatının sentyabrın 26-na təyin edilən referendumla bağlı təsis etdiyi “Respublikaçi Alternativ” Təşəbbüs Qrupunun səlahiyyətli nümayəndələridir.

Gənclərin saxlanması ilə bağlı deyilənlərə, hələlik, Daxili İşlər Nazirliyindən münasibət öyrənmək mümkün olmayıb.

3 gün əvvəl, avqustun 12-də də REAL-in icra katibi Natiq Cəfərli məhkəmənin qərarı ilə 4 ay azadlıqdan məhrum edilib. O, qanunsuz sahibkarlıq və vəzifə səlahiyyətlərindən sui-istifadədə ittiham edilir. Bu ittihamlarla Natiq Cəfərli əmlakı müsadirə olunmaqla 3 ildən 8 ilədək müddətə azadlıqdan məhrum edilə bilər.

REAL hərəkatı ittihamları qəbul etmir. Natiq Cəfərlinin prezidentin göstərişi ilə həbs edildiyini bəyan edib.-0-