Rüfət Səfərovun apellyasiya şikayətinə baxılır

Bu gün Şirvan Apellyasiya Məhkəməsində Zərdab Rayon Prokurorluğunun keçmiş müstəntiqi Rüfət Səfərovun şikayəti üzrə hazırlıq iclası keçirilib. O, rüşvət almaq ittihamı ilə 9 il azadlıqdan məhrum edilib.

Vəkil Bəhruz Bayramov Turan-a bildirib ki, müdafiə tərəfi bir sıra vəsatət qaldırıb: “birinci instansiya məhkəməsində kobud prosessual pozuntular səbəbindən” qismən məhkəmə istintaqı ilə şikayətə baxılması.

Bundan əlavə, vəkil həbs qətimkan tədbirinin dəyişdirilməsini, R.Səfərovun məhkəmə istintaqı müddətində həbsdən azad edilməsini və ona vəkillə yanaşı oturmağa imkan yaradılmasını xahiş edib.

Hakim Ələsgər Novruzov birinci vəsatəti qismən təmin edib, iki digərini isə baxılmamış saxlayıb. Dinləmələr dekabrın 1-nə təyin edilib.

Vəkilin sözlərinə görə, dekabrın 1-də R.Səfərovun ifadəsi dinlənildikdən sonra hakim digər vəsatətlər üzrə qərarlar qəbul edəcək.

R.Səfərov öz çıxışında bildirib ki, sifarişlə həbs olunub. Hakimin “məhkəmə heyətinə etirazın varmı?” sualının cavabında R.Səfərov deyib ki, Azərbaycanda ədalətli məhkəmə yoxdur və məhkəmə hakimiyyətin sifarişini yerinə yetirəcək.

O deyib ki, hökuməti tənqid etdiyinə görə cinayət məsuliyyətinə cəlb edilib, onun barəsində sərt hökm isə referendum ərəfəsində müxalifətin mitinqlərində iştirakla bağlı bəyanatları ilə izah olunur.

Keçmiş müstəntiq Rüfət Səfərov 2016-c ilin sentyabrında rüşvət almaq ittihamı ilə 9 il azadlıqdan məhrum olunub. Bundan öncə “davranış normalarını pozduğuna görə” prokurorluq orqanlarından xaric edilib.

Onun atası, hakim partiyanın keçmiş fəalı, uzun müddət parlamentin deputatı, sonralar Müdafiə Nazirliyinin mətbuat katibi olmuş  Eldar Sabiroğlu Ramiz Mehdiyevi səriştəsizlikdə ittiham edib. Bundan sonra R.Səfərova təzyiqlər başlayıb.  -06В-03В06-