Sahibkarlar ziyann tam ödənməməsindən çikayət edirlər

Mart ayında Bakının Nizami rayonundakı "Diqlas" Ticarət Mərkəzində (TM) baş vermiş yanğın nəticəsində mal itkisinə məruz qalan bir qrup sahibkar mayın 1-də Prezident Administrasiyası önündə toplaşıblar.

Sahibkarlar bu toplaşmalarını problemlərinin həll olunmaması ilə izah ediblər: "Bizə dəyən ziyan ödənməyib, təzyiqlər var, istintaq gedir deyə yanan malları qaytarmırlar", deyə sahibkarlar bildiriblər.

Onların sözlərinə görə, ilkin yardım kimi nəzərdə tutulan vəsatlərdən 2 min manat, 10 min manat alan da var, heç almayan da var, hər sahibkara dəyən ziyanın həcmi isə 10 min manatdan 50 min manata qədər və daha yuxarıdır.

Sahibkarlara görə, onlara iş yerləri təklif edənlər var, problem odur ki, mal almağa pulları yoxdur : "Bir tərəfdən pulumuz yox mal alaq, digər tərəfdən istintaq gedir deyə mallarımızı götürə bilmirik. Daha bir tərəfdən yardım kimi götürdüyümüz pullar borc-xərclərimizə gedib. Odur ki, dövlət başçısından xahiş edirik ki, bizə köməklik etsin. İcraçı direktorlar bizi məruz qaldığımız itkini maliyyə vəsaiti olaraq tam göstərməyə qoymurlar. Deyirlər ki, bizim də borc xərcimiz var".

Sahibkarlardan bəziləri bildiriblər ki, hətta evlərinə zəruri ərzaq almağa belə pulları yoxdur, "Biz heç nə istəmirik, bizə dəyən ziyanın ödənilməsini istəyirik. Prezident fərman verdi ki, vəsait ödənsin, amma aşağdakılar "bizə "baxaq da, bəlkə" kimi cavab verirlər. Odur ki, son ümid olaraq Preizdent Administrasiyasının qarşısına toplaşdıq ki, diqqəti problemimizə cəlb edə bilək". deyə sahibkarlar bildiriblər.

Xatırladaq ki, martın 26-da "Diqlas" TM-də yanğın baş verdi. Yanğında 400-dən yuxarı sahibkar ziyan çəkdi. Martın 28-də bu məsələ ilə bağlı dövlət başçısı iclas keçirdi. İclasda sahibkarlara dəyən ziyanın ödənməsi, iş yerlərilə təmin olunmaları ilə bağlı İqtisadiyyat Nazriliyi daxilində komissiya yaradıldı. Bundan əlavə, yanğının səbəblərinin araşdırılması barədə tapşırıq verildi. Martın 29-da sahibkarlara dəyən ziyanın ödənilməsi üçün 3 milyon manat vəsaitin ayırlması barədə sərəncam imzalandı. Xüsusi komissiya isə üç gün ərzində sahibkarları fərdi qayda da qəbul edərək problemlərini dinlədi.