Sayt redaktoru islah işlərinə cəlb edilib

Bakı/17.06.20/Turan:  Ağdam Rayon Məhkəməsində “Məlahət” MMC-nin rəhbəri Məlahət Qurbanovanın iddiası üzrə “Criminal.az” saytının redaktoru Anar Məmmədovun barəsində proses başa çatıb.

Məhkəmə çəkişməsinə “Keçmiş nazir “Lombard Məlahət”i məhkəməyə verdi” – “Torpaqlarımı boşalt...", “Lombard Məlahət”lə sabiq nazirin davası: “Rolls-Royce” mərkəzinin zirzəmisini bölə bilmirlər” başlıqlı məqalələr səbəb olub.

Məqalələrdə söhbət M.Qurbanova ilə keçmiş əmək naziri Füzuli Ələkbərov arasında qeyri-yaşayış sahəsinə görə çəkişmədən gedirdi.

M.Qurbanova iddia edib ki, lombardla məşğul olmur və jurnalisti eks-nazirin maraqlarını müdafiə etməkdə ittiham edir. O, A.Məmmədovun CM-in 147-ci (böhtan) və 148-ci (təhqir) maddələri ilə mühakimə olunmasını tələb edib.

Məhkəmə 147.1-ci maddə üzrə jurnalistə bəraət verib, 148-ci maddə üzrə isə bir il islah işlərinə cəlb edib. İl ərzində onun əməkhaqqından 20%  dövlətin xeyrinə tutulacaq.

Həmin hökmün icrası bundan öncə verilmiş digər cəzadan - 5,5 il müddətinə şərti cəzadan ayrılıb.

Bu cəzanı o, 2018-ci ildə Gəncənin keçmiş icra başçısı Elmar Vəliyevə qarşı sui-qəsd barədə “Criminal.az” saytında dərc olunan məlumatlarla əlaqədar qeyri-dövlət çağırışlarında, səlahiyyət həddini aşmaqda və vəzifə saxtakarlığında ittiham olunaraq alıb.

A.Məmmədov hökmü qanunsuz və əsassız, Azərbaycan Konstitusiyasına və Avropa Konvensiyasının 10-cu maddəsinə (ifadə azadlığı) zidd adlandırıb. O, hökmdən yuxarı məhkəmə instansiyalarına şikayət etmək niyyətindədir.

A.Məmmədovun barəsində bundan öncəki hökmü bir sıra beynəlxalq jurnalist təşkilatları, həmçinin ATƏT-in KİV azadlığı üzrə nümayəndəsi Arlem Dezir pisləyiblər.06B-