Səhiyyə Nazirliyi: «Günəşli» platformasında yanğından zərərçəkmişlərə psixoloji yardım göstərilib

Azərbaycanın Səhiyyə Nazirliyi mətbuatda gedən “Günəşli” neftçıxarma platformasında yanğın nəticəsində xilas edilmişlərə və itkin düşmüşlərin ailə üzvlərinə psixoloji yardım göstərilməməsi ahqqında məlumatlarla razı deyil.

“2015-ci il dekabrın 6-da saat 12:30-da Səhiyyə Nazirliyinin tapşırığı ilə AR SN-nin Psixi Sağlamlıq Mərkəzinin (PSM) bir qrup mütəxəssisi “Günəşli” neftçıxarma platformasında yanğın nəticəsində zərərçəkmişlərə və itkin düşmüşlərin ailə üzvlərinə psixoloji yardım göstərmək üçün SOCAR şirkətinin ofisinə göndərilib”, deyə Səhiyyə Nazirliyinin mətbuat xidmətinin rəhbəri Liya Bayramova Turan-a bildirib.

Qrupun tərkibinə aşağıdakı mütəxəssislər daxil olub:

Kəmalə Talıbova – PSM təcili psixoloji yardım şöbəsinin müdiri

Aysel Babayeva – kliniki psixoloq

Günel Quliyeva – kliniki psixoloq

Günel Əliyeva – həkim-psixiatr

Aygün Sultanova – kliniki psixoloq

Xudaverdi Məmmədov – kliniki psixoloq

Elnarə Baxşəli – uşaq psixoloqu.

Beş gün ərzində SOCAR şirkətinin ofisində mütəxəssis psixoloqların növbəsi təşkil edilib və bu müddət ərzində 22 zərərçəkmişə və onların ailə üzvlərinə təcili psixoloji yardım göstərilib.

Sonradan psixoloji yardım üçün müraciət edənləri bilavasitə SOCAR şirkətinin ofisinin yaxınlığında yerləşən PSM-yə göndərmək qərara alınıb, burada daha altı vətəndaşa yardım göstərilib.

“SOCAR şirkətinin rəhbərliyi daim Mərkəzimizlə əlaqə saxlayıb və fəaliyyətimizi yüksək qiymətləndirib”, deyə Bayramova bildirib.

 Turan-ın artıq məlumat verdiyi kimi, “Günəşli” platformasında ötən il dekabrın 4-də 10 ballıq fırtına baş verib. 32 nəfər xilas edilib, 13 neftçi həlak olub və 18 nəfər itkin düşmüş hesab olunur. -0-