MSDM: İqtidar böhranın qarşısını almaq gücündə deyil

“Ölkədə sosial-iqtisadi böhran gündən-günə dərinləşməkdədir. Dünya bazarında neftin qiymətinin davamlı şəkildə düşməsi korrupsiya və inhisarçılığın, səriştəsizlik və bərbad idarəçiliyin girovuna çevrilmiş Azərbaycanda fəlakətli bir vəziyyət yaradıb”, deyə Milli Strateji Düşüncə Mərkəzi (MSDM) mövcud durumla bağlı xalqa mürciət edir.

Müəlliflərə görə, iqtidar yarımçıq və ziddiyətli addımları ilə əslində böhranın qarşısını almağa qadir olmadığını nümayiş etdirib. Beynəlxalq maliyyə mərkəzlərindən borc almaq cəhdləri də iqtidarın gücsüzlüyünün etirafıdır.

Sənəddə bu ilin yanvar ayında bölgələrdə keçirilmiş etiraz aksiyaları Azərbaycan tarixində sosial-iqtisadi tələblərlə keçirilən ən yekcins, davamlı və sinxron kütləvi tədbirlər kimi dəyərləndirılir. Etiraz aksiyalarının böyüməsi, sosial-iqtisadi gərginliyin ictimai-siyasi gərginliyə çevrilməsi zaman məsələsidir”, deyə müəlliflər vurğulayırlar.

Müxalifətin bu spontan aksiyalara yalnız mənəvi-siyasi və informasion dəstək verməsi prosesi xaosa aparmaqda maraqlı olmamasının əməli sübutu adlandırılır.  

“Xalq problemlərin həllinə ümid edir, əks halda etirazların daha kütləvi və qarşısıalınmaz olacağına, əhalinin maraqlarını nəzərə almayan və problemlərini həll etməyə qadir olmayan hakimiyyətin ən qısa zamanda dəyişəcəyinə inanmaq istəyir”, deyə sənəddə qeyd edilir.

Daha sonra MSDM mövcud böhrandan çıxa bilmək üçün cəmiyyətə yeni “Yol xəritəsi” təklif edir. “Yol xəritəsi”nin əsas məqsədi əhalini böhrandan qorumaq, iş adamlarına azad iqtisadi fəlaiyyət, demokratik qüvvələrə öz potensilaını gerçəkləşdirmək, rejimə isə hakimiyyəti dinc və tədrici şəkildə xalqa təhvil vermək şansı yaratmaqdır.

“Böhrandan İmkana Yol Xəritəsi” adlanan layihədə təcili olan sosial, iqtisadi və siyasi tədbirlər əksini tapır.

Layihədə sosial tədbirlər sırasında aztəminatlı ailələrlə bağlı qərarların qəbul edilməsi, kəskinləşən işsizlik, aşağı maaş, kredit bocları sahəsində addımlar atılması əksini tapır.  

İqtisadi tədbirlərə gəlincə, azad iqtisadiyyatın formalaşması, kiçik və orta biznesin dirçəldilməsi, kənd təsərrüfatı və turizmin inkişaf etdirilməsi vurğulanır.

Siyasi tədbirlər sistemində siyasi məhbusların azad olunması, insan azadlıqlarının təminatı, vətəndaş cəmiyyəti institutlarının bərabər fəaliyyətinə imkan yaradılması qeyd edilir. Xarici siyasət sahəsində Avroatlantik məkana interqasiya, Nato və Ümumdünya Təşkilatına üzvlük xüsusi vurğulanır. 

Müəlliflər 2016-cı ilin fevralında yeni Konstitusiya (və ya Konstitusiyaya əlavə və dəyişikliklər) layihəsinin hazırlanması məqsədilə Konstitusiya Komitəsi yaradılması, bu ilin yazında yeni Konstitusiya (və ya Konstitusiyaya əlavə və dəyişikliklər) üçün referendum keçirilməsi, bu ilin ikinci yarısında parlament, 2017-ci ildə isə prezident seçkiləri keçirilməsi təklifi verirlər.   

Adı çəkilən sənədlə bağlı fevralın 6-sı saat 15:00-da Müsavat Partiyasında müzakirələr nəzərdə tutulur. -05D-