Səid Dadaşbəyli həbsdə qaldı

Bakı/02.05.19/Turan: Mayın 2-si Nizami rayon Məhkəməsi həbsdə olan Səid Dadaşbəylinin vaxtndan əvvəl azzadlığa buraxılması ilə bağlı müraciətini təmin etməyib. Proses Dadaşbəylinin saxlandığı 15 saylı cəzaçəkmə müəssisəsində keçirilib.

Məhkəmə Ədliyyə Nazirliyinin yanında İctimai Komitəsinin və cəzaçəkmə müəssisəsinin mənfi rəyini nəzərə alaraq, Dadaşbəylini vaxtından əvvəl azadlığa buraxılmasını məğbul saymadı.

Hüquq müdafiəçisi Samir Kazımlının AzadlıqRadiosuna verdiyi məlumatına görə, məhkəmənin qərarında Səid Dadaşbəylinin yatdığı yerinin yığmaması və əməklə məşğul olmaması imtinanın səbəbləri kimi göstərilib.

Hüquq müdafiəçisi Rəsul Cəfərov məhkəmənin qərarını şərh edərək qeyd etdi ki, mart ayında əfvdən sonra yaradılan pozitiv gözləntilər özünü doğrultmur. "Burada məntiq görünmür. Çünki bir tərəfdən əfvlə 50-dən artıq məhbus azadlığa buraxılır, digər tərəfdən isə çıxmasına o qədər də çox vaxt qalmamış siyasi məhbuslar buraxılmır".

Cəfərov qeyd etdi ki, bu hakimiyyətinin siyasi məhbuslardan alver predmeti kimi istifadə edilməsi niyyətini göstərir.

Xatırladaq ki, 10 dekabr 2007-ci ildə Bakı Ağır Cinayətlər Məhkəməsi Səid Dadaşbəylini 14 il, Rəşad Əliyevi 14 il, Ceyhun Əliyevi 14 il, Fərid Ağayevi 13 il, Samir Qocayevi 13 il, Bəybala Quliyevi 13 il, Cahangir Kərimovu 13 il, Rasim Kərimovu 13 il, Emil Möhbalıyevi 12 il, Mikayıl İdrisovu 12 il müddətinə azadlıqdan məhrum edilib. Bakı Apellyasiya Məhkəməsi 25 fevral 2008-ci ildə, Ali Məhkəmə isə 2008-ci ilin payızında hökmü qüvvədə saxlayıb.

Hüquq müdafiə təşkilatlar onları siyasi məhbuslar kimi tanıyıb.--0--