Şikəstlərin problemləriylə məşğul olan Türkiyə QHT-si Azərbaycanla da əməkdaşlıq etmək istəyir

Bakı/07.04.23/Turan: Turan İnformasiya Agentliyinin məlumatına görə, hər il 10-16 may tarixlərində keçirilən Əlillər Həftəsi çərçivəsində bu il mərkəzi Kahramanmaraş olan zəlzələdə şikəst olanlara maddi və mənəvi dəstək vermək üçün xüsusi proqramlar hazırlanacaq.

Ölkədə korlar üçün çap edilən yeganə mətbuat orqanı olan  `Görmeyenler` qəzeti və Türkiyə Şikəstlər Dərnəyinin təşkilatçığıyla həyata keçiriləcək dəstək proqramına hazırlıq işləriylə bağlı təşkil edilən  mətbuat konfransında çıxış edən Türkiyə Şikəstlər Dərnəyi başqanı Şükrü Boyraz deyib: ”Zəlzələnin ilk günündən  etibarən həm bölgələrə yardımlarımızı əsirgəmədik həm də şikəst qalan insanların sayını hesablayıb maddi və mənəvi dəstək tədbirlərinə hazırlıq gördük. Biz heç bir şikəstin və əlilin haqqının qulaq ardına vurulmasını, onlara laqeyd qalınmasını istəmirik. Ona görə 10-16 may tarixlərində həm bölgələrə yardım maşınları göndərəcəyik həm də bilavasitə özümüzün iştirakıyla mədəniyyət proqramları keçirəcəyik. Mən millət vəkilliyinə namizədliyimi məhz şikəst və əlillərin problemləriylə məşğul olmaq üçün irəli sürmüşəm. Seçilsəm, şikəst və əlillərin problemlərinin aradan qaldırılması üçün parlamentin gündəminə yeni qanunlar gətirəcəyəm”.

Mətbuat konfransında Turan Agentliyinin “Gördüyünüz bu işlərdə beynəlxalq təşkilatlardan və əcnəbi ölkələrdəki Qeyri-Hökumət Təşkilatlarından dəstək alırsınızmı?” sualını Şükrü Boyraz bu şəkildə cavablandırıb: ”Əlbəttə ki, dəstək alırıq. Türkiyə Şikəstlər Dərnəyinin fəaliyyətini daha da gücləndirmək üçün mən Avropanı, ABŞ-a, Asiya ölkələrinə getmişəm. Əlil və şikəstlərə daha çox diqqət yetirilməsi üçün sosial dövlət anlayışının güclü olması lazımdır. Azərbaycan kimi etnik baxımdan bizimlə eyni olan ölkələrin  dövlət qurumları və QHT-ləriylə də yaxından əməkdaşlıq etmək istəyərdik”.

1960-cı ildə yaradılan Türkiyə Şikəstlər Dərnəyinin Türkiyənin 70 vilayət və rayonunda şöbəsi var.