SOCAR öz işgüzar nüfuzunu qoruyacaq

Azərbaycan Dövlət Neft Şirkəti (SOCAR) bu qurumun yüksək vəzifəli şəxsinin Türkiyənin Bodrum şəhərində 20 milyon dollara 16 villa alması barədə KİV-də yayılan xəbərləri araşdırıb.

SOCAR-ın məlumatında deyilir ki,  şirkətin Risklərin İdarəedilməsi Komitəsi SOCAR-ın Əsaslı Kapital Qoyuluşları İdarəsinin rəis müavini Qiymət Mehdiyevin həyat yoldaşının 16 villa alması barədə məlumatı araşdırıb.

Komitənin gəldiyi nəticəyə görə, SOCAR-ın Biznes Etika Məcəlləsinin şirkətin əməkdaşları üçün müəyyən etdiyi hər hansı normasının pozulması halları aşkar edilməyib.

Komitə qeyd edib ki, KİV-də yayılan informasiyanın SOCAR-ın fəaliyyəti ilə heç  bir əlaqəsi yoxdur.

Bu cür halları SOCAR-ın fəaliyyəti ilə bağlamaq cəhdləri şirkətin işgüzar nüfuzuna, yerli və beynəlxalq layihələrin reallaşdırılmasına mənfi təsir göstərə biləcək risk kimi qiymətləndirilib.

Bəyanatda deyilir ki, Qiymət Mehdiyevin “dövlət məmuru” anlayışının altına salınması, onun dövlət orqanında çalışması haqqında yanlış təsəvvür yaradılması, aldığı əmlakın dəyərinin bilərəkdən 300 dəfə artırılaraq ictimaiyyətə çatdırılması, əldə etdiyi gəlirlərin isə qeyri-sağlam təhlili bu şəxsin özünü və ailəsini qanuni mənafeləri nəzərə alınmadan ictimaiyyətin gözündən salmağa yönəldilmiş cəhdlərdir.

Komitəsinin bu qərarını nəzərə alaraq SOCAR işgüzar nüfuzuna qarşı yönəlmiş bu məlumatların müəlliflərini qanunvericiliyin tələblərini pozmamağa, əsassız və yoxlanılmamış məlumatları yaymamağa çağırır.

“Yuxarıda qeyd edilən yanlış məlumatın SOCAR ilə əlaqələndirilərək ictimaiyyətə təqdim edilməsi təəssüf doğuran haldır və bu hal SOCAR-ın işgüzar nüfuzuna xələl gətirir”, - məlumatda deyilir.

Qeyd olunur ki, belə hallar SOCAR-ı işgüzar nüfuzunun müdafiəsi üçün əsassız, yoxlanılmamış və böhtan xarakterli məlumatlar yayanlar barəd zəruri hüquqi tədbirlər görmək hüququndan istifadə etməyə məcbur edir.

Xatırladaq ki, villaların alınması barədə məlumatı Haqqin.az saytı dərc edib.

Q.Mehdiyev bu məlumatı təkzib edərək bildirib ki, onun həyat yoldaşı yalnız bir villanın qiymətinin yarısı dəyərində daşınmaz əmlak alıb və məbləğ 60 min dollara yaxın təşkil edib.06D-