SOCAR prezidenti: İdrak Abbasov Sulutəpədə əmlakçıların maraqlarını müdafiə edirdi

Dövlət Neft Şirkətinin prezidenti Rövnəq Abdullayev şirkətin təhlükəsizlik xidmətinin işçilərinin jurnalist İdrak Abbasovu döyməsi haqqında ittihamları təkzib edib.

“İdrak Abbsov Sulutəpədə jurnalist kimi fəaliyyət göstərmirdi, qanunsuz torpaq satışı ilə məşğul olan bir qrup əmlakçının müdafiəçisi rolunda çıxış edirdi”, deyə Abdullayev bildirib. 

Abbasov jurnalist jileti geymişdi və ona amansız hücumun onlarla şahidi var, bu necə ola bilər? – sualına cavabda şirkət rəhbəri bildirib ki, bu, yalandır. “Jileti ona sonradan geydiriblər, o, əməkdaşları təhrik edir, onlara daş atırdı. Əlimdə buna dair faktlar var. Ümumiyyətlə, İdrak Abbasov və qardaşı Sulutəpədə torpaq alış-verişi üzrə qanunsuz sövdələşmələrdə iştirak edirlər”, deyə Abdullayev bildirib.

O, şirkət işçilərinin qanunsuz mənzillərin sökülməsi üzrə əməllərinə bəraət qazandıraraq, hazır evlərin sökülmədiyini, “yalnız tamamlanmamış, içərisində heç kim yaşamayan evlərin tikintisinin qarşısı alındığını” iddia edib.

İdrak Abbasovun döyülməsinə görə niyə heç kimin cəzalandırılmadığı haqqında suala cavabda Abdullayev bildirib ki, onlar qanunsuz heç nə etməyiblər, sadəcə “səlahiyyətlərini bir qədər aşıblar”. -02D-