Müdafiə Komitəsi H.Məmmədovun vəziyyətindən narahatdır

“Tolışi sədo” qəzetinin həbsdə olan redaktoru Hilal Məmmədovun Hüquqlarını Müdafiə Komitəsi cümə günü mətbuat konfransı keçirib.

Komitə sədri Rafiq Cəlilov H.Məmmədovla bir kamerada saxlanılan müttəhimin durumunun və H.Məmmədovun vəziyyətinin narahatlıq doğurduğunu deyib. Belə ki, H.Məmmədovla eyni kamerada saxlanılan müttəhim bir tərəfdən kəskin nevroz, digər tərəfdən ürəktutmaları keçirir. Komitə belə sağlıq durumu yaşayan insanın davranışına nəzarəti itirməsi üzündən H.Məmmədova qarşı istənilən addımı ata bilməsindən narahatlıq ifadə edib. Penitensiar xidmət nümayəndələri həmin şəxsin H.Məmmədovun olduğu kameradan cümə günü aparılacağını desələr də, bu vədin yerinə yetirilib-yetirilmədiyini bilmirlər. 

H.Məmmədovun həbsdə olduğu 5 ay ərzində ailə üzvlərilə görüşünə cəmi bir dəfə icazə verilib, bundan sonra isə görüşlə bağlı müraciətlərə cavab verilməyib.   

H.Məmmədovla bağlı istintaq da başa çatıb, müstəntiqlər H.Məmmədovu cinayət işinin materialları ilə tanış edirlər. H.Məmmədov cinayət işini, ona qarşı ittihamları saxta adlandırır. Komitə sədri qeyd edib ki, müstəntiqlər bəzi yerlərdə Talış Mədəniyyət Mərkəzinin mərhum sədri Novruzəli Məmmədova aid ittihamları eynilə H.Məmmədova aid ediblər. Halbuki, H.Məmmədovun elan edilən həmin ittihama heç bir aidiyyatı olmadığı qeyd edilib. İstintaqın H.Məmmədovu “Talışskiy Vestnik” qəzetinin redaktoru kimi təqdim etməsinin əsassız olduğu deyilib. Komitə sədri müstəntiqlərə adı çəkilən qəzetin heç olmasza sonuncu səhifəsinə baxaraq, redaktorun kim olmasını öyrənmələri tövsiyəsi verib. “Bu cinayət işi, bu ittihamlar absurddur”, - deyə komitə sədri mövqeyini izah edib.

H.Məmmədov 2012-ci il iyunun 21-də həbsə alınıb. Ona qarşı dövlətə xəyanət, milli ədavəti qızışdırmaq, narkotik saxlamaq ittihamları irəli sürülüb. -05C-