“Sovetski” küçəsinin keçmiş sakinləri yenidən etiraz edirlər

Bakı/09.03.21/Turan: Keçmiş “Sovetski” küçəsinin sakinləri martın 9-da Yasamal rayon İcra Hakimiyyətinin binası qarşısında toplaşaraq növbəti etiraz aksiyası keçiriblər.

Onlar 2014-cü ildə evləri sökülərkən verilmiş ədalətsiz kompensasiyalardan şikayət edirlər. Etirazçılar bildirirlər ki, onları evlərindən polis çıxarıb və hər bir mənzil üçün cəmi 28-38 min manat ödəniş edilib.

Sakinlərdən birinin sözlərinə görə, mənzilinin sahəsi 160 kv m təşkil etdiyi halda ona 142 kv m üçün ödəniş ediblər. Sakinlər onlara ayrılmış pulla mənzil ala bilmədiklərini iddia edirlər.

Rayon icra hakimiyyəti etirazçıların 4 nümayəndəsini qəbul edib.

“Sovetski”nin sökülməsi 2014-cü ildə başlayıb. 26 hektardan çox sahəni əhatə edən ərazidə 4 min 500-ə yaxın yaşayış və qeyri-yaşayış obyekti bir çox hallarda sakinlərlə əldə edilmiş razılığa əsasən sökülüb.

İkinci mərhələdə isə 1 920 evin söküldüyü bildirilir. Bu zaman söküntü işləri təqribən 13 hektar ərazini əhatə edib.

Amma hər iki mərhələdə kompensasiyanın məbləği ilə (hər kvadrat metrə 1500 manat ödənilib) razılaşmayan, söküntüyə dirəniş göstərən ailələr olub. Onlar müxtəlif dövrlərdə aksiyalar keçiriblər. Bununla bağlı bir sıra şikayətlər artıq Avropa İnsan Hüquqları Məhkəməsinə də göndərilib. -30C-