Tağıyev Kombinatına aid yataqxananın sakinlərinin səsi eşidilmir

Zeynəlabdin Tağıyev adına Kombinata məxsus 4 saylı yataqxananın sakinləri bu gün Prezident Administrasiyası, Nazirlər Kabineti və paytaxt meriyası qarşısında etiraz aksiyaları keçirirlər. Bu barədə Media Mərkəzdə keçirilən bugünki mətbuat konfransında hüquq müdafiəçisi Ələkbər Məmmədov bildirib.

Onun sözlərinə görə, yataqxanada vəziyyət dözülməz hal alır, yağışlar və düşən soyuqlar sakinləri problemin həllini axtarmağa məcbur edir, belə ki, yataqxanada şərait yaşayış üçün tamamilə yararsızdır. “Əlavə tikili, binanın fasadının üzü sökülüb, insanlar qəzalı vəziyyətdə yaşayır”, deyə o bildirib.

Artıq xəbər verildiyi kimi, 2000-ci il zəlzələsindən sonra bina qəzalı vəziyyətə düşüb. Bu binada 160 ailə və 12 məcburi köçkün ailəsi yaşayırdı. “Oğuz” tikinti şirkəti 160 ailə üçün yeni bina tikib. Tikinti 2008-ci ildə başlayıb, 2012-ci ildə başa çatıb. Lakin yalnız 80 ailəyə mənzil verilib. Digər 80 ailə isə köhnə yataqxanada qalıb. Onları aldadaraq, yeni mənzillərdən imtina etdikləri barədə sənəd imzaladıblar. Öz növbəsində, Nazirlər Kabineti binanın bərpa və təmir edilməsi haqqında qərar qəbul edib, FHN isə binanın qəzalı vəziyyətdə olması barədə rəy verib. Beləliklə, məsələ durğunlaşıb və indiyədək həllini tapmayıb. -04С-