Taleh Bağırzadə: «Gedin hakimə deyin ki, getsin polisi müdafiə etsin»

Noyabrın 30-da Bakı Ağır Cinayətlər Məhkəməsində “Müsəlman Birliyi” Hərəkatının həbsdə olan sədri Taleh Bağırzadə, AXCP sədrinin müavini Fuad Qəhrəmanlı və digərlərinin cinayət işi üzrə növbəti məhkəmə iclası şahid ifadələri ilə davam edib.

Əlövsət Abbasovun sədrlik etdiyi prosesdə təqsirləndirilən şəxs Abbas Hüseyn bir daha hakimə məhkəmə prosesində haqq-ədalətin olmadığını bildirib.

Daha sonra Fuad Qəhrəmanlı Tacəddin adlı bir şəxs məhkəmə salonundan çıxdıqdan sonra onun evinə polislərin getdiyini, ünvanı isə şəxsiyyət vəsiqəsindən götürdüklərini bildirib. “Həmin adama 30 sutka həbs cəzası veriblər. Hətta həmin şəxs məhkəmədən çıxdığı zaman polislər tərəfindən təhdid olunub. Bura agentlikdir, ya məhkəmə?”.

Hakim zaldakılara bildirib ki, əgər elə hallarla qarşılaşan olarsa, məhkəmənin sədrinə müraciət etsinlər.

Bundan sonra vəkil Yalçın İmanov 42-ci polis bölməsinin əməkdaşı Tərxan Əhmədovun, Sabunçu Polis bölməsinin müstəntiqləri İsmayıl Əliyev və Fikrət Quliyevin əlavə şahid qismində dindirilməsi üçün vəsatət verib.

Daha sonra Taleh Bağırzadə hal şahidlərinin də məhkəmədə dindirilməsini istəyib.

“Nardaran hadisəsinə görə 21 maddə ilə bizi ittiham edirlər. 8 nəfər hal şahidi var, amma onlar gəlməyib və şahidlər siyahısına əlavə olunmayıb. “Bandotdel”də bizə işgəncə verənlər gəlib burada zərərçəkmiş qismində ifadə verdilər. Biz bilirik ki, hal şahidləri yoxdur”.

Hakim vəsatət barədə fikri söyləyərək, məhkəməyə gələn şahidlər bitdikdən sonra, əlavə şahidlərin gələcəyini bildirib.

Vəkil Fariz Namazlı bildirib ki, Müsəlman Birliyi Hərəkatının üzvləri (25 nəfər) və 8 hal şahidləri əlavə şahidlər deyil. Bu şəxslər istintaq dövründə dindirilib və protokolda var. Nədənsə ittiham haqqında məhkəməyə çağırılacaqlar siyahısında yoxdur”.

Vəkil Yalçın İmanov hakimə sual verib ki, “bəs o iki polis niyə gəlmir məhkəməyə? Yoxsa onlara da təyziq edirlər?”. Bu suala cavabı Abbas Hüseyn verərək bildirib ki, “Onları gərək güclə “bandotdel” gətirə”.

Daha sonra Abbas Hüseyn Kürdəxanı həbsxanasında məhkumların saxlanılması və asudə vaxtları barədə danışıb.

O, bir aydan çoxdur televizora baxa bilmədiklərini deyib.

“ Bir aydan artıqdır orada hüquqlar pozulub. Atv+ pullu olub deyə, heç kim tv-yə baxa bilmir. Atv-dən başqa heç bir kanal göstərmir. Aztv-nin hər gün ölkəmizə dediyi tərifləri, “Xəzər”in yalan xəbərlərini eşidə bilmirik”.

Məhkəmə prosesinin ikinci hissəsində  isə şahid Sabunçu Rayonunun Polis İdarəsinin cinayət axtarış şöbəsində çalışan Haşımov Samir dindirilib.

O, ifadəsi oxunmadan, istintaq zamanı verdiyi ifadəni təsdiqləyib. Zaldakılar və təqsirləndirilən şəxslər onun ifadəsini təkrar verməsini tələb edib. Şahid ifadəsi zamanı bildirib ki, “Noyabr ayının 5-də bölmənin qabağında kənd sakinləri var idi. Onlar Elçin Qasımova görə yığışmışdılar. İdarədən “təkbir” səsinə çıxdım. Aşağıda bəzi kənd sakinlərini tanıyırdım. Yaxınlaşdım onlara dedim ki, içəri keçib içəridə olanları sizə xəbər edəcəyəm. Onlar mənlə razılaşsa da, bir qrup şəxs başladı polislərə daş atmağa, əl-qol hərəkətləri etdilər. Bu, yarım saat davam etdi”.

Vəkil Nemət Pənahovun “orada olduğun zaman polsilər gəldimi, hadisə təqribən saat neçədə baş verib?” və bu kimi suallarına şahid “bilmirəm” cavabı verib. Bu zaman vəkil şahidə “Sizin yaddaşınızda deyəsən problem var”, deyib. Şahid vəkilə “Danışığına fikir ver”, deyə qışqırıb. Təqsirləndirilən şəxslər və zaldakılar şahidin bu hərəkətinə irad tutması üçün hakimə xəbərdarlıq etdilər. Lakin hakim buna baxmayaraq vəkilə iradını bildirib.

Bu zaman olanlara səssiz qalmayan Abbas Hüseyn hakimə bildirib ki, şahidə xəbərdarlıq etsin. “Siz görürsünüz ki, o şəxs bizim vəkilimizə hörmətsizlik edir. Amma siz iradınızı vəkilə bildirirsiz. O, vəkilə “kimsən?” deyir”. Şahid H.Samir Abbası təhqir edib. Bu zaman A.Hüseyn ayaqqabısını çıxarıb atmaq istədiyi vaxt, təqsirləndirilən digər şəxs Əlibala Vəliyev buna imkan verməyib.

Hakim Taleh Bağırovun, Abbas Hüseynin və Cabbar Cabbarlının məhkəmədən müvəqqəti uzaqlaşdırıldığını deyib. Bu zaman T.Bağırov məhkəmə nəzarətçilərinə bildirib ki, “Gedin hakimə deyin ki, getsin polisi müdafiə etsin. Gəlib burada hakimlik etməsin. Bizim üçümüzü əgər aşağı salsalar, digərləri yuxarı qalxmayacaq. Ondansa məhkəmə salonundakıları çıxardın, bizi də göndərin geri”.

Müşavirədən sonra şahid qismində dindirilən S.Haşımov gəlsə də, təqsirləndirilən şəxslər gəlməyib. Hakim isə bildirib ki, təqsirləndirilən şəxslər məhkəmənin göstərişinə əməl etmədiyi üçün onlar da müvəqqəti məhkəmədən uzaqlaşdırılsın.

Bu zaman təqsirləndirilən şəxslərin ailələri zalı tərk edib. Hakim buna etiraz etsə də, onlar dinləməyib. Ə.Abbasov məhkəmə nəzarətçilərinə bildirib ki, indi çıxıb gedən şəxslər bir daha məhkəməyə buraxılmasın. Vəkillər isə şahidə sual verməyərək, öz etirazlarını bildiriblər.

Növbəti məhkəmə prosesi dekabrın 2-nə təyin olunub. -36B-