Azərbaycanın müstəqilliyinin Böyük Britaniya tərəfindən tanınmasının 25 illiyi münasibətilə qəbul

Çərşənbə günü axşam Böyük Britaniyanın Bakıdakı səfirinin iqamətgahında Azərbaycanın müstəqilliyinin Birləşmiş Krallıq tərəfindən tanınmasının 25 illiyi münasibətilə təntənəli qəbul keçirilib.

Böyük Britaniya səfiri Kerol Krofts qeyd edib ki, ötən müddətdə ikitərəfli əlaqələr bütün fəaliyyət sahələrini əhatə edib.

Londonun Azərbaycanla əməkdaşlığı inkişaf etdirməyə və genişləndirməyə sadiq olmasına təsdiq olaraq baş nazirin ticarət üzrə nümayəndəsi, baronessa Emma Nikolsonun başçılıq etdiyi nümayəndə heyəti Bakıda səfərdədir.

Səfirin sözlərinə görə, ikitərəfli münasibətlər dostluq və əməkdaşlıq ruhunda dinamik inkişaf edir.

Öz növbəsində Azərbaycan xarici işlər nazirinin müavini Mahmud Məmmədquliyev qeyd edib ki, Bakı 25 il öncə gənc dövlətin müstəqilliyini ilk tanıyan ölkələr sırasında Böyük Britaniyanın da olması faktını yüksək qiymətləndirir.

Bunun ardınca diplomatik münasibətlər qurulub, əməkdaşlığın inkişafına başlanılıb.

İlk növbədə əməkdaşlıq neft və qaz sahəsində inkişaf etməyə başlayıb, Britaniya şirkətləri Azərbaycana gəlməyə başlayıblar. Hazırda Azərbaycan islahatlar həyata keçirir, iqtisadiyyatı diversifikasiya edir, əməkdaşlığın genişləndirilməsi üçün yeni imkanlar açır.

M.Məmmədquliyev ümidvar olduğunu bildirib ki, gələcəkdə əməkdaşlıq daha çox inkişaf edəcək və hər iki ölkənin xalqına fayda gətirəcək.

Baronessa Nikolson xatırladıb ki, Böyük Britaniya Azərbaycanın müstəqilliyini tanıyan beşinci ölkədir.

O deyib ki, əvvəlki baş nazir Devid Kemeron tərəfindən Azərbaycan üzrə ticarət nümayəndəsi təyin edilib. Hökumətin yeni rəhbəri Tereza Mey də Azərbaycanla əməkdaşlığın inkişafını vacib sayır.

Baronessa prezident İlham Əliyev və digər rəsmi şəxslərlə görüşünün yekunlarından razı qaldığını bildirib.

“İkitərəfli münasibətlərin möhkəmləndirilməsi işində iştirak etmək mənim üçün şərəfdir. Üç gün çox pozitiv və səmərəli keçdi, çoxlu görüşlər oldu”, - o vurğulayıb.

Böyük Brtitaniya 1991-ci il dekabrın 26-da Azərbaycanın müstəqilliyini tanıyıb. İki ölkə arasında diplomatik əlaqələr 1992-ci il martın 11-də qurulub. 1993-cü ilin sentyabrında Birləşmiş Krallıq Bakıda öz səfirliyini açıb. Azərbaycanın Londonda diplomatik missiyası 1994-cü ilin yanvarında fəaliyyətə başlayıb. 

Böyük Britaniya Azərbaycanda iri investordur. Ötən 25 ildə Britaniya investisiyalarının həcmi 25 mlrd. dollar təşkil edib.—06