Təcili yardımın vaxtında cavab verilməməsi narahatlıq doğurur

Yanvarın 3-də Abşeron rayonun Masazır qəsəbəsində yaşadığı evinin 2-ci mərtəbəsindən yıxılan yeniyetmə tibbi yardımsız qalıb.  Bu barədə yeniyetmənin qonşusu Nərmin Hüseynzadə Turana deyib.

N.Hüseynzadə bildirib ki, hadisə 22:05-də baş verib və hadisədən dərhal sonra, yəni 22:08-də o, Təcili Tibbi Yardıma zəng vurub: "103 xidmətinə zəng vurdum, məni 112 xidmətinə yönəldirdilər: "Onlar dedilər ki, biz indi təcili tibbi yardımı yönəldiririk. Təxminən 15-20 dəqiqədən sonra yenə zəng vurdum, dedilər yönəldirmişik. Hər 15 dəqiqədən bir hamımız zəng vururduk ki, işin ciddi olduğuna varsınlar. Sonra bir nömrə verdilər ki, Masazıra o baxır. Həmin nömrə ümumiyyətlə cavab vermədi. Hər dəfə zəng vurduqca yönəldirmişik deyirdilər, amma gəlib-gəlmədiyini heç kim dəqiq demirdi".

N.Hüseynzadə qeyd edib ki, uşaq qan itirirdi, şüuru gedib-gəlirdi: "Gördük ki, gələn yoxdur, uzun taxtanı götürdük, kustar üsulla özümüzə xərək düzəltdirdik, uşağı ora uzatdıq və baqajı açılan köhnə maşını ilə Travmatologiya xəstəxanasına çatdırdıq. Oradan artıq uşağı təcili tibbi yardım maşını ilə 1 saylı Klinik Tibb Mərkəzinə apardılar". 

Onun sözlərinə görə, hadisədən 3 saat sonra təcili tibbi yardımdan zəng gəlib: "Bir xanım soruşub ki, gələk? Dedim nə gəlirsiz, uşaq artıq xəstəxanadadır. Dedim ki, sizi şikayət edəcəm. Mənə cavab verdi ki, kimə istəyirsiz, şikayət edin, mən bu gün 12 çağırışa getmişəm, çatdıra bilməmişik". 

Nərmin Hüseynzadə bildirib ki, yeniyetmə hazırda reanimasiyadadır: "Xəstəxanaya gedənə qədər çoxlu qan itirib, hemoqlobin düşüb deyə, əməliyyata apara bilmirlər".

Amma çağırışa gələn olmadı: "Düz 1 saat yarım uşaq qaldı betonun üstündə, qanının içində. 7 dəfə zəng etdim, dedi gələcək. Gəlmədi. Uşağın sınıq-sınıq olmuş qolun, qıçın bir yerə toplayıb həyətdən tapdığımız taxtanın üstünə uzadıb, maşınla xəstəxanaya çatdırası olduq". 

Məsələ ilə bağlı TƏBİB-in İctimaiyyətlə əlaqələr şöbəsinin müdiri Elnur Hidayətoğlu Turana bildirib ki, məsələ ilə əlaqədar hazırda müvafiq araşdırma aparılır: "Araşdırmanın nəticəsinə uyğun olaraq aidiyyəti üzrə tədbirlər görüləcək. Zərurət yaranarsa, hüquq-mühafizə orqanlarına müraciət olunacaq". 

Qurumun rəsmisi qeyd edib ki, Abşeron rayonu üzrə bayram günlərində günlük normadan artıq müraciət qeydə alınıb, bütün tibbi yardım briqadaları xidmətə cəlb olunub: "Bildiririk ki, təcili və təxirəsalınmaz tibbi yardım xidmətinin işi optimallaşdırılaraq təkmilləşdirilir. Xidmət keyfiyyətinin yüksəldilməsi üçün struktur optimallaşdırılması həyata keçirilir, cari ilin ilk aylarında proses tam yekunlaşacaq". 

E.Hidayətoğlu əlavə edib ki, hazırda Kliniki Tibbi Mərkəzin Reanimasiya şöbəsində müalicə alan 15 yaşlı A.A-ya EKQ, KT, ultrasəs və laborator müayinələri, uşaq cərrahının, torakal cərrahın, reanimatoloqun, travmatoloqun və neyrocərrahın baxışı təmin olunub: "Birgə konsiliumun nəticəsinə uyğun olaraq hazırda ona zəruri tibbi xidmətlərin göstərilməsi davam etdirilir". 

Ötən ilin dekabrında İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev qurumun illik hesabatını təqdim edərkən bildirib ki, 100 ədəd yeni təcili tibbi yardım avtomobilinin alınıb.

Onun sözlərinə görə, icbari sığortanın tətbiqindən sonra 349 sayda ambulans maşını alınıb: "İcbari tibbi sığortanın tətbiqindən əvvəl ambulanslara olan ehtiyacın ödənilən hissəsi 40 faiz idisə, hazırda 64 faiz təşkil edir".--0--