Tofiq Yaqublu: Prokurorluq Qumaşyana görə məndən qisas alır (YENİLƏNİB)

İsmayıllı hadisələri üzrə hökm martın 17-də elan ediləcək.

Martın 11-də Müsavat Partiyasının sədr müavini Tofiq Yaqublu son sözlə çıxış edib.

Emosional nitqində o, İsmayıllıda müxalifətin iğtişaşlar təşkil etməsi haqqında bütün ittihamları təkzib edib. “Bu, məmur özbaşınalığına qarşı xalq etirazı idi”.

İstintaq iğtişaşların vurduğu maddi ziyanı hesablayıb, amma az maaşı olan rayonun keçmiş icra başçısı Nizami Ələkbərovun hansı pulla təmtəraqlı ev tikdiyi, bahalı avtomobillər aldığı ilə maraqlanmayıb.

Neft Akademiyasında kütləvi qətlin jurnalist araşdırmasına görə Baş Prokurorluq rəhbərliyinin çoxdan ona qarşı qərəzi var idi. Həmin vaxt prokurorluq Gürcüstan vətəndaşı olan erməni Mardun Qumaşyanı qətlin təşkilatçısı elan etmişdi. Yaqublu Gürcüstana gedərək, Qumaşyanın adi insan olduğunu, hüquq-mühafizə orqanlarının isə ona qarşı iddiası olmadığını, Azərbaycan tərəfin isə Qumaşyanla bağlı Gürcüstan hakimiyyətinə müraciət etmədiyini müəyyən edib.

Yaqublu deyib ki, o, 80 il müddətinə həbs edilsə belə, azadlıq uğrunda mübarizəyə görə həbs edilməsi ilə qürur duyacaq. -06D-  
 

2014 Mart 11 (Çərşənbə axşamı) 15:25:09

Bu gün Şəki Ağır Cinayətlər Məhkəməsində İsmayıllı hadisələri üzrə müttəhimlərin yekun çıxışları davam edib.

Müttəhim Rəşid Məmmədov bildirib ki, yanvarın 23-də o, hadisə yerində yox, çayxanada olub.

Ceyhun Abbasov özünü günahkar saymadığını deyib və məhkəmədən xahiş edib ki, onun ailə vəziyyəti nəzərə alınsın.

Elşən İsmayıllı bildirib ki, yanvarın 24-də iğtişaşlar zamanı İsmayıllıda olmayıb.

İkinci qrup əlil Səxavət Səmədov etiraf edib ki, yanan “Çıraq” otelindən mebelləri qorumaq üçün çıxarıb və növbəti gün geri qaytarıb. O, məhkəmədən xahiş edib ki, səhhəti və ikinci qrup əlil olan anasının onun himayəsində olması nəzərə alınsın.

Vasif İbrahimov deyib ki, o, müsahibə verərək məmur övladlarının əhalini bu dərəcəyə çatdırdığını bildirdiyinə görə həbs olunub. Sonra deyib ki, o, rayon polisinin rəisi Şöhrət Kərimovun göstərişi ilə həbs olunub. Belə ki, ona haqq verməyib (V.İbrahimovun kiçik kommersiya obyekti var).

Xəyal Şirinov məhkəmədən xahiş edib ki, ailəsinin vəziyyəti, azyaşlı uşağının əməliyyat olunmasının vacibliyi nəzərə alınsın. Belə ki, evə qazanc gətirən yeganə şəxs odur.

REAL hərəkatının lideri İlqar Məmmədov qısa çıxış edib. Onun çıxışı bir qədər sonra vəkilləri tərəfindən açıqlanacaq. O bildirib ki, Sovet imperiyasının süqutundan sonra onun məkanında bir neçə xanlıqlar yaradılıb ki, bunlardan biri də Azərbaycandır və burada insan hüquqları pozulur.

İ.Məmmədov deyib ki, onun seçkilərdə iştirakına imkan verməmək üçün həbs ediblər.

Prokurorun təklifinə (İ.Məmmədovun 8 il həbs olunması) görə, o 2020-ci ilədək seçkilərdə iştirak edə bilməyəcək. İ.Məmmədov deyib ki, ondan ötrü mühüm olan məhkəmənin qərarı deyil, beynəlxalq birliyin münasibətidir ki, ABŞ, Aİ ölkələri səfirliklərinin, Aİ missiyası nümayəndələrinin məhkəmədə iştirakı sayəsində beynəlxalq birlik iş üzrə obyektiv təsəvvürə malikdir.  

Sonra Müsavat Partiyasının sədr müavin Tofiq Yaqublunun çıxışı başlayıb.  Çıxış günün ikinci yarısında davam edəcək.-06/27D-