Vaşinqtondan Krımdakı böhrana baxış

Vaşinqtonun Avropa, Rusiya və Avrasiya Araşdırmalar İnstitutunun direktoru Ceff Sahadeo Turan-a müsahibəsində Ukrayna böhranı və onun regiona, o cümlədən Cənubi Qafqaza mümkün təsiri ilə bağlı vəziyyəti şərh edib.

Rusiyanın regional ambisiyaları haqqında danışan analitik Putinin yenidən SSRİ yaratmaq istədiyini istisna edib.

O hesab edir ki, Baltika ölkələri itirilib, Azərbaycan itirilib, Mərkəzi Asiya başqa istiqamətdə hərəkət edir. Rusiyanın onları öz orbitasına qaytarmaq üçün gücü və sərvəti yoxdur.

Dondurulmuş münaqişələr, əlbəttə ki, Gürcüstana və Moldovaya təzyiq üçün vasitədir, Ermənistanı və hətta Moskvadan rus silahı alan Azərbaycanı Rusiyadan asılı vəziyyətdə saxlamağa kömək edir.

“Ukraynada ola bilər ki, ruslar Krımdan Abxaziya və Cənubi Osetiya kimi istifadə etmək istəyiblər, amma zənnimcə Putin və onun ətrafı Qərbin reaksiyasını və ya mümkün daxili xərcləri yetərincə qiymətləndirmir”, deyə o bildirib.

“Rusiyalılar hesab edirlər ki, Ukrayna onların təsir dairəsi hüdudlarında yerləşməlidir. Kreml sabitliyi pozmaq və Ukraynanın NATO-ya daxil olmasına mane olmaq üçün əlindən gələni edəcək.

Ukraynaya qoşun göndərmək strategiyası Putin üçün böyük risklər yaradır. “O, Ukraynada separatçı hərəkatları dəstəkləyirsə, niyə Rusiyanın özündə mərkəzdənqaçma qüvvələri yaranmasın? Rusiya SSRİ deyil, o, regional hüquqlarının tanınmasını, dünya işlərində (Suriya, İran) mühüm rol oynamaq, əsas Avrasiya dövləti statusuna malik olmaq istəyir.

Rusiyanın müdaxiləsi olarsa, beynəlxalq müdaxilə mümkündürmü? Bu suala cavabda Sahadeo deyib ki, Qərbin birbaşa müdaxilə etməsini təsəvvür etmək çətindir.

Bu, total regional müharibəyə səbəb olardı. Ukrayna hərbiçilərinin müqavimət göstərib-göstərməyəcəyini anlamaq da çətindir. Krım müstəqilliyini elan edərsə necə olar? Ukrayna qoşunları regionu tərk edərlərmi? Ukrayna milliyyətçiləri partizan müharibəsinə başlasa necə? Hələlik bu suallara cavab yoxdur, deyə Sahadeo bildirib. -25В-