Türkiyə vətəndaşları Bakıda oğurlanıb və vətənə göndərilib

Bakı/22.02.18/Turan: Türkiyə KİV-ləri Bakıda bu ölkənin iki vətəndaşının yoxa çıxdığı barədə məlumat yayıb. Bu, Azərbaycan məhkəmələrinin onları həbsdən azad etməsindən dərhal sonra baş verib.

Mətbuatın məlumatına görə, Ayhan Seferoğlu Ankaranın 2016-cı ilin iyulunda uğursuz çevriliş cəhdinin təşkilatçısı elan etdiyi türk ilahiyyatçı Fetullah Gülenlə əlaqələrdə ittiham olunurdu.

2018-ci il yanvarın 5-də Ankara məhkəməsi Seferoğlu barəsində axtarış elan edib. O, Azərbaycanda Bakının Nərimanov rayonunda yaşayırdı və "Türk-Baycan" şirkətində işləyirdi. Əvvəllər o, Bakıda Gülenin başçılıq etdiyi "Hizmet"in strukturuna daxil olan türk məktəblərindən birində dərs deyirdi.

Ankaranın sorğusu əsasında Seferoğlu fevralın 8-də həbs edilib və Nərimanov rayon məhkəməsi onu 40 gün müddətinə həbs edib.

Amma ayın 19-da o, gözlənilmədən baş prokurorun birinci müavini Rüstəm Usubovun təşəbbüsü ilə azad edilib, bu barədə onun vəkili Zaur Niftəliyev bildirib.

Fevralın 19-da Nərimanov rayon məhkəməsi Seferoğlunun həbsdən azad edilməsi haqqında təqdimatı təmin edib. Amma bir neçə dəqiqə sonra o, məhkəmə zalından yoxa çıxıb. Vəkilin sözlərinə görə, Penitensiar Xidmətin əməkdaşları sənədlərin tərtib edilməsi bəhanəsi ilə Seferoğlunu aşağı aparıblar və arxa qapıdan maşına mindirib aparıblar, deyə vəkil bildirib.

Onun yerini nə Miqrasiya Xidməti, nə DİN müəyyən edə bilməyib.

Seferoğlunun həyat yoldaşı Meydan TV-yə bildirib ki, bir müddət sonra naməlum nömrədən ərinin İstanbul polisində olduğu barədə sms alıb.

Türkiyə KİV-ləri həmçinin yazırlar ki, Seferoğlu ilə birlikdə, bu ölkənin daha bir vətəndaşı - Erdoğan Taylan da yoxa çıxıb. O, Binəqədi rayon məhkəməsində mühakimə olunurdu.

Vaxtilə, 2000-ci illərin ortalarında Azərbaycanda çeçenlər müəmmalı şəkildə yoxa çıxırdı, sonradan onlar Çeçenistanda ölü tapılırdılar. Görünür, indi türklərin növbəsi çatıb. -06D-