Ülkər İsayevanı döyənlərin azad edilməsi barədə məhkəmə qərarından protest verilib

Xətai Rayon Məhkəməsinin Ülkər İsayevanı fiziki işgəncəyə məruz qoyanların azad edilməsi ilə bağlı qərarından Bakı Şəhər Prokurorluğu apellyasiya protesti verib. Protestə bu gün Bakı Apellyasiya Məhkəməsində baxılacaq.  Bu barədə Baş Prokurorluğun mətbuat xidmətinin rəhbəri Eldar Sultanov bildirib.

Belə ki, martın 9-da saat 04.25 radələrində Zaur Məmmədov qardaşı Elin Məmmədovla bir qrup şəxs halında sərxoş vəziyyətdə ictimai yerdə heç bir səbəb olmadan tanışları İsayeva Ülkər Hamlet qızını idarə etdikləri  90 KU 050 dövlət nömrə nişanlı “BENTLEY”  markalı avtomobildən zorla çəkib çıxarmaqla yerlə sürüyərək əl və ayaq  zərbələri endiriblər. Vətəndaşların müdaxiləsinə baxmayaraq, sakitləşməyən sərxoş qardaşlar Ü.İsayevaya dəfələrlə fiziki işgəncə veriblər.

Martın 12-də qardaşlar polis tərəfindən şübhəli şəxs qismində saxlanılıblar.  Bakı Şəhər Baş Polis İdarəsinin təqdimatı əsasında Bakı Şəhər Prokurorluğu Cinayət Məcəlləsinin 221.2.1-ci (xuliqanlıq) maddəsi ilə təqsirləndirən şəxs qismində cəlb edilmiş hər iki şəxsin barəsində həbs qətimkan tədbirinin seçilməsinə dair qərar qəbul olunmasını məhkəmədən xahiş edib. Martın 14-də Xətai Rayon Məhkəməsinin hakimi Raziyə Ataşovanın çıxardığı qərara əsasən Zaur və Elin Məmmədov qardaşları məhkəmə zalından azad buraxılıblar.

Ülkər İsayeva Xəzər Universitetinin rektoru Hamlet İsaxanlının qızıdır.