UNICEF Azərbaycanda hər bir uşaq üçün inkişaf konsepsiyasını irəli sürür

UNICEF təşkilatın təsis edilməsinin 70-ci ildönümünü keçirir. Bu barədə UNICEF-n ictimaiyyətlə əlaqələr şöbəsinin məlumatında bildirilir.

Azərbaycanda 70 illik yubiley mərasiminin əsas tədbirlər planına dekabrın 14-də Gənclər və İdman Nazirliyi ilə birlikdə gənclərin iştirakı ilə xatirə tədbiri, eləcə də uşaqlar üçün inkişaf məsələlərinin müzakirə edilməsi məqsədilə dekabrın 15-də Azərbaycan Milli Məclisində xüsusi görüş daxildir.

“Bu gün UNICEF Azərbaycanın uşaqlarına və gənclərinə, onların mümkün ola bilən ən yaxşı gələcəyinə həmişə olduğundan daha ciddi şəkildə istiqamətlənib. Biz bütün uşaqların eyni imkanlara, eyni həyat şərtlərinə və öz hüquqlarına, eyni qayğıya malik olacaqları gələcəyə nail olmağa can atırıq”, - UNICEF-in Azərbaycandakı nümayəndəsi Edvard Karvardin qeyd edib. “Mən inanıram ki, hər bir uşaq üçün sərmayəni təşviq etmək məqsədilə hökumətdə, parlament, vətəndaş cəmiyyəti və beynəlxalq ictimaiyyətdəki tərəfdaşlarımızla birlikdə işləməklə biz öz konsepsiyamızın Azərbaycanın hər yerində bütün ailələr və icmalar üçün reallığa çevriləcəyinin şahidi olacağıq.

İşə başlamağımızdan yetmiş il keçdikdən sonra bizim qeyd etməyə çoxlu səbəblərimiz olduğu kimi, uşaqlar üçün görüləcək işlərimiz də hələ çoxdur”, - o vurğulayıb.

Karvardinin sözlərinə görə, Azərbaycanda uşaqlar üçün həyat ildən-ilə yaxşılaşır. “Biz istəyirik ki, bu inkişaf bütün ölkə boyu və hər bir şəraitdə hər bir uşağı əhatə etsin – öz keçmişimizi qeyd etdiyimiz kimi, bu da bizim gələcək üçün konsepsiyamızdır”, - o bildirib.

UNICEF müharibədən sonrakı Avropada, Çin və Yaxın Şərqdə uşaqlara kömək məqsədilə Birləşmiş Millətlər Təşkilatının Baş Assambleyası tərəfindən yaradılıb. Bütünlüklə hökumətlər, vətəndaş cəmiyyətləri, özəl sektor və maraqlı vətəndaşlardan gələn könüllü ianələr hesabına maliyyələşməklə tezliklə öz əhatə dairəsini genişləndirib. 1955-ci ildən 90-dan artıq ölkədə uşaqlarla iş aparır.

UNICEF Azərbaycanda öz işinə 1993-cü ildə başlayıb. Onun ilk proqramları nəinki yalnız milli inkişaf prioritetlərinə yönəlmək, eləcə də təxirəsalınmaz humanitar ehtiyacları qarşılamaq üçün işlənib hazırlanıb. UNICEF-in ölkə üzrə ilk proqramları əsasən peyvəndləmə, səhiyyə, reabilitasiya, qida, təhsil və uşaqların müdafiəsi kimi təxirəsalınmaz ehtiyaclara yönəlib.

 Məlumatda deyilir ki, hökümət və vətəndaş cəmiyyəti ilə birlikdə işləyərək UNICEF Azərbaycanda əhəmiyyətli inkişafa öz töhfəsini verib. Buna Azərbaycanı poliomielitdən azad ölkəyə çevirməyə və digər profilaktikaya tabe xəstəliklər təhlükəsinin azaldılmasına kömək, uşaqlar üçün təhsil standartlarının yaxşılaşdırılmasına kömək və əlilliyi olan uşaqlar üçün daha çox sinif otaqlarının açılması, məcburi köçkün düşərgələrində yaşayan uşaqlar üçün dəstək proqramları, uşaqların rifah halının yaxşılaşdırılması islahatlarının başlanmasına kömək, gənclər üçün idmanla məşğul olmaq və asudə vaxtlarını daha yaxşı keçirmək məqsədilə imkanların yaradılması və uşaq hüquqlarının Azərbaycanın qanunvericilik bazasına daxil edilməsi üçün tövsiyələr daxildir.

UNICEF həyata keçirdiyi bütün fəaliyyətlərdə uşaqların hüquqlarını və rifahını dəstəkləyir. Ən həssas və təcrid olunmuş vəziyyətdə olan uşaqlarla əlaqə yaratmaq üçün xüsusi səy göstərməklə, dünyanın istənilən yerindəki uşaqların maraqları naminə tərəfdaşları ilə birgə 190 ölkədə və bölgədə bu öhdəliyi praktik olaraq həyata keçirmək üçün fəaliyyət göstərir. -16D-