Vəkil Ağayev Azərbaycan Ali Məhkəməsinə şans verir

Dekabrın 4-də və 5-də Azərbaycan Ali Məhkəməsində iki mühüm işə baxılması gözlənilir. 

Vəkil Fuad Ağayevin Turan-a verdiyi məlumata görə, dekabrın 4-də saat 15.20-də tanınmış ziyalı Rüstəm İbrahimbəyovun Azərbaycan Dövlət Neft Şirkətinə qarşı mülki işinə, dekabrın 5-də saat 15.40-da isə hüquq müdafiəçisi Leyla Yunus və Arif Yunusun Bakı şəhər icra hakimiyyətinə, Əmlak Komitəsinə və s. qarşı iddiasına dair inzibati işdir. 

Vəkilin sözlərinə görə, bu işləri birləşdirən bir neçə amil var. Vətəndaş xüsusi mülkiyyətdən məhrum edilib, vətəndaşa külli miqdarda ziyan vurulub, məhkəmələr mülkiyyət hüquqlarını bərpa etməyib və dəyən ziyana görə kompensasiya  tutmayıb.

F.Ağayev bu məhkəmə prosesini Ali Məhkəməyə ölkədə ədalət mühakiməsinin az da olsa mövcudluğunu isbat edə bilmək üçün verilmiş imkanlardan biri sayıb. Baş vermiş pozuntular o dərəcədə ciddidir ki, bu, Azərbaycanı hüququn aliliyinə riayət olunması baxımından dünyanın ən geridə qalmış ölkələri arasında belə autsayderlər sırasına qoyur. 

Məlum olduğu kimi, İbrahimbəyov və Yunus fəal ictimai mövqe tutur, buna görə Azərbaycan hakimiyyəti tərəfindən amansız hücumlara məruz qalır. -05B-