Vəkil: �Babək Həsənova ailəsi ilə görüşmək və zəng etmək imkanı yaradılmır�

Bakı/05.08.18/Turan: "Hüquqlarını müdafiə etdiyim Babək Həsənova ailəsi ilə görüşmək və zəng etmək imkanı yaradılmır. Bakı İstintaq Təcridxanasının rəhbərliyi məhdudiyyətin istintaq orqanı tərəfindən qoyulduğunu, istintaq orqanı isə heç bir məhdudiyyətin qoyulmadığını bildirir. Müraciətlərimizə isə hələ rəsmi cavab almamışıq", - vəkil Cavad Cavadov hüquqlarını müdaqfiə etdiyi Babək Həsənovun yazılı müraciətinə əsaslanaraq Turan-a bildirib.

B.Həsənov mayın 25-də həbs olunub. Ona qarşı Saleh Rüstəmov, Vidadi Rüstəmli, Aqil Məhərrəmov, Ruslan Nəsirov, Eltac Əlisoyla birgə Cinayət Məcəlləsinin 192.3.2 (xüsusilə külli miqdarda gəlir əldə etməklə qanunsuz sahibkarlıq), 193-1.3.1 və 193-1.3.2-ci (mütəşəkkil dəstə tərəfindən cinayət yolu ilə əldə edilmiş külli miqdarda pul vəsaitlərini və ya digər əmlakı leqallaşdırma) və s. maddələrlə ittiham irəli sürülüb.

Respublika Prokurorluğu və Daxili İşlər Nazirliyinin birgə məlumatında deyilir ki, Rusiyada yaşayan Saleh Rüstəmov biznes strukturlarında çalışan və əvvəllər tanıdığı ayrı-ayrı Azərbaycan vətəndaşlarından hər ay pul toplayaraq Moskva şəhərində kommersiya bankında açdığı hesabına keçirdiyi 30 min ABŞ dollarını 2016-cı ilin martından etibarən Bakı şəhərində valyuta əməliyyatlarının qanunsuz köçürülməsi ilə məşğul olan Ceyhun Hüseynov, Rauf İsgəndərov, Heydər Əhmədov və Tural Mehdixanov vasitəsilə Vidadi Rüstəmliyə çatdırılmasını təmin edib. V. Rüstəmlinin həmin vəsaitləri qəbul edib Aqil Məhərrəmov, Ruslan Nəsirov və Babək Həsənova, onların isə AXCP-nin funksionerlərinə vermələri ilə, ümumilikdə 412 min ABŞ dollarını AXCP-nin tədbirlərinin maliyyələşdirilməsinə, dəstə üzvlərinin iqtisadi maraqlarının təmin olunmasına və digər maliyyə əməliyyatlarının həyata keçirilməsinə, beləliklə də cinayət yolu ilə əldə edilmiş külli miqdarda pul vəsaitlərinin leqallaşdırılması əməllərini törətmələrinə əsaslı şübhələr müəyyənləşib".

Öz növbəsində, AXCP rəsmi məlumatı təkzib edib, yalan və böhtan adlandırıb.

Vəkil mətbuat vasitəsi ilə Ədliyyə Nazirliyindən və baş prokurordan xahiş edib ki, həbs edilmiş şəxsin elementar hüquqlarının təmin edilməsi üçün tapşırıqlar verilsin.
C.Cavadov bildirir ki, B.Həsənov Bakı İstintaq Təcridxanasına gətirildiyi gündən onun hüquqları pozulur.

"Həbs yerlərində saxlanılan şəxslərin hüquq və azadlıqlarının təmin edilməsi haqqında" qanuna əsasən həbs edilmiş şəxs yaxın qohumları və ya əlaqə saxlaması onun üçün qanuni maraq doğuran digər şəxslər ilə ayda dörd dəfə 4 saatadək müddətə ləyaqətli şəraitdə və nəzarət altında görüşmək hüququna malikdir. Həbs edilmiş şəxslər həftədə iki dəfə 15 dəqiqəyədək müddətdə telefonla danışmaq hüququna malikdir. Lakin B.Həsənova ailəsi ilə görüşmək və zəng etmək imkanı yaradılmır", vəkil qeyd edib. -03B-