Vəkil: Həbsxanada 39 gündür aclıq edən Zamin Salayevə həkim nəzarəti yoxdur

Bakı/17.03.23/Turan: Azərbaycan Xalq Cəbhəsi Partiyasının (AXCP) Salyan rayon təşkilatının sədri Zamin Salayev 1 saylı Bakı İstintaq Təcridxanasında 39 gündür aclıq edir. Salayev şərlənərək həbs edildiyini bildirir və məhkəmənin həbs qərarına etiraz olaraq aclıq edir.

"Zamin Salayev 26 kiloqram arıqlayıb. Qan təzyiqi 80/50-dir. Böyrəklərində və ürəyində ağrılar hiss edir. Ağrılardan əziyyət çəkir. Buna baxmayaraq, aclığı davam etdirməkdə israrlıdır”, deyə vəkil Nemət Kərimli martın 17-də 1 saylı Bakı İstintaq Təcridxanasında Zamin Salayevlə görüşündən sonra bildirib.

Vəkilin sözlərinə görə, Zamin Salayev 39 gündür aclıq etməsinə baxmayaraq, ona həkim nəzarəti yoxdur.

"Səhhəti ağır olmasına baxmayaraq, hələ də həkimlər onu müayinə etməyib. O, hələ də təcridxananın tibb-sanitar hissəsinə köçürülməyib".

Kərimlinin sözlərinə görə, bu gün Ombudsman Aparatının nümayəndələri Zamin Salayevlə görüşüblər.

"Ombudsman ötən dəfə görüşün nəticəsi olaraq Zamin Salayevə qarşı münasibətlə bağlı Penitensiar Xidmətə və prokurorluğa müraciət edib. Lakin müraciətə hələ cavab verilməyib və Salayevə qarşı münasibət də dəyişməyib".

Vəkil artıq iki dəfə təcridxananın rəhbərliyi ilə görüşərək Salayevin durumu ilə bağlı məlumat verib.

"Təcridxananın rəhbərliyi bildirir ki, aclıq etmək onun hüququdur. Yalnız koma vəziyyətinə düşərsə onu məcburi qidalandıracaqlar", deyə o qeyd edib. 

Vəkil deyib ki, Zamin Salayev barəsində seçilmiş həbs qətimkan tədbirinin ev dustaqlığı ilə əvəvz edilməsi barədə  Qaradağ rayon Məhkəməsinə neçə gün əvvəl vəsatət verməsinə baxmayaraq, hələ də vəsatətə baxılmayıb.  

Ombudsman Aparatının Mətbuat xidmətindən Amerikanın Səsinə bildiriblər ki, ombudsmanın tapşırığı ilə martın 17-də 1 saylı Bakı İstintaq Təcridxanasında Zamin Salayevə baş çəkmə olub.

"Zamin Salayev konfidensial şəraitdə Ombudsmanın nümayəndələri tərfəindən qəbul olunub. Ombudsmanın mandate çərçivəsində lazımi tədbirlər görüləcək. Ötən dəfə  də qeyd etdiyimiz kimi, aidiyyatı qurumlara sorğu göndərilib. Aiddiyatı qurumlardan cavab alan kimi müvvafiq məlumat yayılacaq", deyə Mətbuat xidmətinin rəhbəri Emil Şahzadə Turan-a bildirib.

Penitensiar Xidmətdən fəalın səhhəti ilə bağlı məlumat almaq mümkün olmayıb. 06B