Vəkil Mövsüm Səmədov, Taleh Bağırzadə və Abbas Hüseynovla görüşüb

Bakı/14.11.17/Turan: Noyabrın 13-də vəkil Cavad Cavadov Qobustan qapalı həbsxanasında dövlət qeydiyyatı olmayan İslam Partiyasının lideri Mövsüm Səmədov və "Müsəlman Birliyi" Hərəkatının sədri Taleh Bağırov, onun müavini Abbas Hüseynovla görüşüb. Bu barədə vəkilin mətbuat üçün açıqlamasında deyilir.

Mövsüm Səmədov 2011-ci ildə hakimiyyətin zorla ələ keçirilməsinə və dövlət quruluşunun dəyişdirilməsinə cəhd ittihamı ilə 12 il azadlıqdan məhrum edilib. Onun həbsi dövlət rəhbərlərini kəskin tənqid etməsindən sonraya təsadüf edir.

2015-ci ilin noyabrında hüquq-mühafizə orqanlarının Nardaranda keçirdiyi xüsusi əməliyyat zamanı ikisi polis olmaqla, 6 nəfər həlak olub. Hadisələrdən sonra 70-dən çox insan həbs olunub. Onların bir qisminə silah saxlama ittihamı ilə il yarımdan 6 il 6 ayadək həbs cəzası kəsilib. 40 nəfərdən çox adama isə daha ağır maddələrlə (dövlət çevrilişinə cəhd, terrorçuluq, dini nifaq salma və s.) ittihamlar verilib.

Üç qrupa ayrılan cinayət işinə Bakı Ağır Cinayətlər Məhkəməsində baxılır. Artıq "Müsəlman Birliyi" Hərəkatının sədri T.Bağırov və daha 17 nəfərin məhkəməsi yekunlaşıb. T.Bağırova, Abbas Hüseynova 20 il, Cabbar Cabbarova 19 il, digərlərinə isə 10 ildən 19 ilədək həbs cəzası verilib.

Vəkil Cavad Cavadov noyabrın 13-dəki görüşdən sonra bildirib ki, Abbas Hüseynovun əhvalı yaxşıdır və saxlanılma şəraitində müəyyən dəyişiklik baş verib.

"O, tavanı tökülən və bərbad durumda olan kameradan nisbətən təmirli, lakin beş nəfərlik kameraya keçirilib. Bununla belə, ümumən əvvəlki problemlər də qalmaqdadır. Əvvəlki kamerada və həbsxanada olan digər kameralarda ayaqyolu hər hansı arakəsmə olmadan kameranın daxilində yerləşir. Su sutkada üç dəfə 2-3 saat verildiyindən və verilən andan bütün həbsxana sudan istifadə etməyə başladığından suyun təzyiqi çox aşağı düşür, su ehtiyatı yığmaqda ciddi çətinlik yaranır".

Abbas Hüseynov bildirib ki, gündəlik bir saatlıq gəzinti ilə bağlı da problemlər var. Belə ki, o, hər gün başqa-başqa vaxtlarda gəzintiyə çıxarılır.

"O, buna etirazını bildirib və buna görə ona əsassız töhmət verilib".

Abbas Hüseynovun ailəsinə yaşadığı ünvana göndərdiyi üç məktub poçt tərəfindən geri qaytarılıb ki, evdə adam yoxdur. "Halbuki, evlərində daim kimsə olur", deyə vəkil qeyd edib.

Taleh Bağırov mütaliə ilə məşğuldur.

"Bildirdiyinə görə, Henri Kissingerin "Diplomatiya", ondan əvvəl Lev Trotskinin "Məktublar və gündəliklər" kitabını oxuyub bitirib".

Vəkil yazır ki, Qobustanda yerləşən həbsxanada məhkumların saxlanılma şəraitində olan problemlərlə bağlı müdriyyət bildirib ki, bunlar binanın köhnə olması və infrastruktur problemləri ilə bağlıdır. Hal-hazırda Bakının Umbakı qəsəbəsində yeni həbsxana inşa olunur, lakin nə vaxta hazır olacağı ilə bağlı konkret vaxt deyilmir. -03D-