Vətən Müharibəsi əlilini məktəbə təmizlikçi təyin ediblər

Azərbaycanda yüksək tribunalardan vətənin müdafiəçilərinə dövlət qayğısı barədə bildirilir. Həqiqətən, İkinci Qarabağ Müharibəsi veteranlarının və əlillərinin sosial problemlərinin həllilə bağlı hallar çoxdur. Bəziləri hətta dövlət qurumlarında aparıcı vəzifələrə təyin olunurlar. Ancaq təəccüblü hallar da olur.

Salyan sakini, İkinci Qarabağ Müharibəsinin iştirakçısı, ikinci qrup əlili, medallarla təltif olunmuş İbrahim Hüseynov ali pedaqoji təhsil diplomu olduğu halda məktəbə təmizlikçi kimi işə qəbul edilib.

"Salyan rayonunun Qaradağlı kəndində təmizlikçi kimi çalışdığım 1 saylı məktəbdə şagirdlər mənə gülürlər. Direktor məni işə qəbul edəndə vəd verdi ki, vakansiya olanda məni ixtisasım üzrə vəzifəyə təyin edəcək, amma vədi yerinə yetirmir", - hərbi əlil jurnalistlərə bildirib

Salyan rayonunun Yenikənd seçki dairəsindən Milli Məclisin deputatı Fəzail Ağamalı veteranın məlumatını təsdiqləyib. O, Hüseynovun məsələsilə məşğul olacağına söz verib.

Şirvan-Salyan Regional Təhsil İdarəsinin rəisi Sənan Məsimli veteranın təmizlikçi təyin edilməsini "korreksiya hazırlığı”  vəzifəsi üzrə boş ştatların olmaması ilə izah edib. Ona vəd ediblər ki, 1-2 ay sonra müəllim vəzifəsindən azad ediləndə boş qalan yerə onu təyin edəcəklər. Ancaq müəllim işdən çıxmayıb. 2020-ci ildə Hüseynov "korreksiya hazırlığı" ixtisası üzrə ali pedaqoji təhsil alıb.

Şirvan-Salyan Regional Təhsil İdarəsində vətənin müdafiəçilərinə dövlət tərəfindən göstərilən qayğının reallığa uyğun olmasına reaksiya verərək bildiriblər ki, Hüseynov öz arzusu ilə məktəbə texniki işçi kimi qəbul edilib və başqa vəzifəyə keçirilməsi xahişilə yazılı şəkildə müraciət etməyib. İdarədən bildiriblər ki, yaxın vaxtlarda veteranın xahişini yerinə yetirəcəklər.