Vətəndaşlar iki tikinti şirkətindən şikayət edirlər

 “Real”  və “Sahil-D”  tikinti şirkətlərindən çoxmərtəbıli binalarda mənzil alan 80-ə yaxın sakin çərşənbə günü etiraz aksiyası keçirib.

Aksiya iştirakçıları Turan-a bildiriblər ki, narazılığa səbəb odur ki, Fəzail Bayramov küçəsi, 11 ünvanında (Bakı Əyləncə Mərkəzinin qarşısı) yerləşən dörd 24 mərtəbəli bina istismara verilməyib.

Bina 7 ildir ki, tikilib, lakin indiyədək qaz, elektrik və su təchizatı sistemlərinə qoşulmayıb, pəncərə və qapı qoyulmayıb. Bu səbəblərdən mənzil sahibləri təmirə başlaya və köçə bilmir.

Şirkətlərə  rəhbərlik edən İlham Qasımov və onun ətrafı məsələnin həllini vəd etsə də yerinə yetirmir.

Mənzil sahiblərinin sözlərinə görə, başqa bir problem də eyni mənzilin müxtəlif şəxslərə satılmasıdır.

Mənzil sahibləri sonuncu dəfə fevralın 1-də şirkət rəhbərliyi ilə görüşüblər və onlara bildirilib ki, ayın sonunadək mənzillər təhvil veriləcək.

Vətəndaşlar şirkət ofisinin qarşısında bir saata yaxın dayansalar da onları heç kim qəbul etməyib.

Bundan sonra vətəndaşlar Xətai Rayon İcra Hakimiyyətinə gediblər. Onların şikayəti dinlənilib və  məsələyə aydınlıq gətiriləcəyinə söz verilib.

Turan-ın sözügedn firmalardan şərh almaq cəhdləri baş tutmayıb.

2000-ci ilin ortalarında Bakıda başlayan tikinti fonunda vətəndaşların aldadılması faktları geniş yayılıb.

Belə ki, 25-ə yaxın şirkət vətəndaşların aldadılması ilə bağlı qalmaqallara cəlb olunub. Bu, tikintinin başa çatmamasında, eyni mənzilin bir neçə şəxsə satılmasında, binaların kommunikasiya ilə təchiz edilməməsində özünü göstərib.

Ondan çox şirkətin məsul şəxsləri həbs olunsa da yüzlərlə vətəndaşın hüquqları pozulmuş qalır.-05B-