Vətəndaşları aldadan şirkət başçısı məhkəməyə çıxarılır

“Fuad LTD” MMC-nin direktoru Qasım Məmmədovun işi Ağır Cinayətlər məhkəməsinə göndərilib. Bu haqda ölkə prokurorluğundan bildiriblər. 

İstintaq Q.Məmmədovun 2005-2009-ci illərdə “Fuad LTD” MMC-nin direktoru olarkən Xırdalan şəhərində mənzil tikintisi adı ilə 186 vətəndaş tərəfindən ödənilmiş 1 milyon 846 min manat pulu mənimsəməkdə, 1 milyon 75 min manat məbləğində külli miqdarda vergi ödəməkdən yayınmaqda ittiham edilir. 

İstintaq Q.Məmmədova qarşı Cinayət Məcəlləsinin 178.3.2-ci (dələduzluq yolu ilə özgə əmlakını külli miqdarda ələ keçirmə), 213.2.2-ci (külli miqdarda vergiləri ödəməkdən yayınma) və 308.2-ci (vəzifə səlahiyyətlərindən sui-istifadə) maddələri ilə ittiham elan edib. İstintaq dövründə vətəndaşlara dəyən ziyanın tam ödənilməsi təmin olunub.

İstintaq tamamlanaraq, Bakı Ağır Cinayətlər Məhkəməsinə göndərilib. “Fuad LTD” MMC-nin mühasibi Ramin İbrahimov barəsində iş ayrıca icraata ayrılıb. İstintaqı Korrupsiyaya qarşı mübarizə idarəsi davam etdirir. -05D-