“Xalqlar Dostuğu”-Lökbatan avtobus marşrutu açılıb

Bakı/25.10.22/Turan: Oktyabrın 27-dən yeni E1 ekspres marşrut xətti fəaliyyətə başlayacaq. Yeni  xətt üzrə avtobuslar metronun "Xalqlar Dostluğu" stansiyasından başlayaraq Qara Qarayev prospekti - "Koroğlu" metro stansiyası - Heydər Əliyev prospekti - Yusif Səfərov küçəsi - Neftçilər prospekti – "Azneft" dairəsi - Bibiheybət - Lökbatan Nəqliyyat Mübadilə Mərkəzi istiqamətində hərəkət edəcək. Marşrut xətti üzrə sərnişindaşımaları "BakuBus" MMC-nin istismarında olan avtobuslarla icra ediləcək.

Bu barədə Turan-a Bakı Nəqliyyat Agentliyindən bildirilib.

Məlumata görə, həmin xətt üzrə gediş haqqı 60 qəpik olacaq.

E1 xəttinin fəaliyyətə başlaması ilə əlavə ödəniş etmədən metronun "Xalqlar Dostluğu" stansiyasından Lökbatan Nəqliyyat Mübadilə Mərkəzi istiqamətində rahat və birbaşa ictimai nəqliyyatla sürətli gediş-gəliş təmin ediləcək. Bu da öz növbəsində vətəndaşların metronun qeyd olunan istiqamətdə qanunsuz sərnişindaşıma vasitələrindən, eləcə də fərdi avtomobillərdən istifadəsini azaldacaq.

İlkin mərhələdə daşımalara 10 ədəd avtobus cəlb ediləcək.

Xətt üzrə avtobuslar səhər saat 06:30-dan axşam saat 18:30-dək fəaliyyət göstərəcək. Avtobuslar hərəkət sxemi üzrə bütün dayanacaq məntəqələri üzrə deyil, yalnız əvvəlcədən müəyyən edilmiş sərnişin təlabatı daha çox olan məntəqələrdə dayanacaq.-0-