Xaricdə 2166 nəfər dini təhsil alıb

1991-ci ildən sonra xaricdə dini təhsil alan Azərbaycan vətəndaşlarının sayı həddindən artıq çoxdur. Bunu Dini Qurumlarla İş üzrə Dövlət Komitəsinin (DQDK) sədr müavini Gündüz İsmayılov parlamentin Hüquq Siyasəti və Dövlət Quruculuğu, İctimai Birliklər komitələrinin dini komitəsinin birgə iclasında bildirib.

O, Azərbaycanda 3 min məscid olduğu halda, xaricdə dini təhsil alanların sayının 2166 nəfər olduğunu nəzərə çatdırıb. Xaricdə dini təhsil almağın qanunla qadağan olmadığını deyən G.İsmayılov xaricdə dini təhsil alanların əksər hissəsinin yerli ali məktəb diplomları olmasına diqqət çəkib.

Onun sözlərinə görə, xaricdə dini təhsil alanlara bu xüsusatı xatırlatdıqda onlar ölkədəki təhsillə bağlı aldıqlarını təsdiqləyən diplomlarını ortaya qoyurlar. Digər tərəfdənsə xaricdə təhsil almağa hər-hansı məhdudiyyət qoyulmur.

G.İsmayılov hər xalqın öz xüsusiyyəti, adət-ənənəsi olduğunu yada salaraq xaricdə dini təhsil alanların təhsil aldıqları müddətdə oradakı həyat tərzini mənimsədiklərini vurğulayıb. G.İsmayılov bu şəxslərin qayıdıb Azərbaycanda fəaliyyətə başlarkən təhsil aldıqları ölkələrin həyat tərzini təbliğ etmələrinin cəmiyyətdə ciddi problemlər yaratdığını iddia edib.

Xatırladaq ki, noyabrın 26-da hüquq-mühafizə orqanları “Müsəlman Birliyi” Hərəkatının rəhbəri Taleh Bağırzadənin həbs edilməsi üçün əməliyyat keçirib.  Əməliyyat zamanı 2 nəfər polis, 5 nəfər mülki şəxs həlak olub. Bundan sonra dini məsələ ilə bağlı müzakirələr bu sahədə qanunvericiliyin sərtləşdirilməsi üçün parlamentin müzakirəsinə çıxarılıb. -05D-