Xədicə İsmayılovanın apellyasiyasına noyabrın 19-da baxılacaq

Jurnalist Xədicə İsmayılovanın apellyasiya şikayətinə baxılması noyabrı 19-na köçürülüb. Bu qərarı bu gün Bakı Apellyasiya Məhkəməsi qəbul edib. Məhkəmə bunu müdafiə tərəfin Apellyasiya Məhkəməsinin hazırlıq iclasının qərarından kassasiya şikayəti verilməsi üçün bir ay vaxtı olması ilə əsaslandırıb.

Bu gün prosesin əvvəlində məhkəmədə iştirak etmək istəyən çoxsaylı insan başqa zala keçirilib, İsmayılovanı qonşu zala gətirib “akvariuma” əyləşdirənə qədər onlar orada saxlanılıb. Bu, jurnalistin bəyanat verə bilməməsi üçün edilib.

Bundan başqa, şüşə otağın qarşısına 20 mühafizəçi düzülüb, onlar Xədicəni görməyə imkan vermirdilər.

Bununla belə, jurnalist “Onlar seçkiləri məhv ediblər” sözləri yazılan kağızı zala göstərməyə müvəffəq olub.

İsmayılovanın işi üzrə prosesdə ilk dəfə olaraq zalın qapısında avtomat silahlı mühafizəçi dayanıb.

Hakim İlqar Murquzov bildirib ki, müdafiə tərəfin Apellyasiya Məhkəməsinin hazırlıq iclasının qərarından kassasiya şikayəti vermək üçün bir ayı var və buna görə növbəti iclas noyabrın 19-na təyin edilir. Bu zama hakim nə İsmayılovaya, nə vəkillərə söz verməyib.

Bundan əvvəl, oktyabrın 15-də keçirilən hazırlıq iclasında məhkəmə müdafiə tərəfin bütün vəsatətlərini təmin etməyib.

Vəkil Fəxrəddin Mehdiyev Turan-a bildirib ki, müdafiə tərəfi apellyasiyaya baxılmasını 4-5 ay uzatmamaq üçün kassasiya şikayəti vermək niyyətində deyil. O, müdafiə tərəfin fikrini soruşmadan prosesi təxirə salan hakimin qərarından təəccübünü ifadə edib. Vəkil Fariz Namazlı hakimin qərarını “qeyri-qanuni” adlandırıb.

Xatırladaq ki, Ağır Cinayətlər Məhkəməsi Xədicə İsmayılovanı saxta vergilərdən yayınma, fırıldaqçılıq və sui-istifadə ittihamları ilə 7,5 il müddətinə azadlıqdan məhrum edib. -03D-