Xədicə İsmayılovanın işi üzrə proses başqa vaxta keçirilib

Binəqədi Rayon Məhkəməsində  jurnalist Xədicə İsmayılovaya qarşı iddia üzrə  bu günə  təyin olunmuş  məhkəmə  prosesi  oktyabrın 23-nə keçirilib.

Vəkil Elton Quliyev Turan-a bildirib ki, məhkəməyə mənşəyi məlum olmayan bəzi sənədlər daxil olub və onlardan sübut kimi istifadə etmək istəyirlər.

Odur ki, vəkil sənədlərin  işdən çıxarılması ilə bağlı vəsatət qaldırıb. Məhkəmə oktyabrın 23-dək yazılı vəsatətin hazırlanmasını təklif edib.

Öz növbəsində X.İsmayılova Turan-ın müxbirinə bildirib ki,  təqdim olunan sənədlər sübut ola bilməz. Onun sözlərinə görə, məhkəmə çalışacaq ki, iddiaçı Elman Həsənova  kömək eləsin. Onlar prokurorluq və MTN ilə birlikdə “sübutlar” toplayırlar.

“Məhkəmə prosesi  belə davam edə bilməz. Çünki  biz məhkəməyə daxil olan sənədlərin sübut olub-olmadığını müəyyənləşdirməliyik”, - X.İsmayılova  bildirib.

Qeyd edək ki, söhbət MTN və prokurorluğun arayışlarından gedir. Bu sənədlərdə bildirilir ki, həmin orqanlar vətəndaşları ələ almaqla məşğuldur. Bundan əlavə, KİV-də yayılan sənədlərdə adı çəkilən və guya E.Həsənovu məxfi əməkdaşlığa cəlb edən adamlar Milli Təhlükəsizlik Nazirliyində işləmirlər.

Xatırladaq ki, bu mövzuda yazılar 2011-ci ildə Facebook-da Mustafa Kozlu adlı istifadəçi tərəfindən yayılıb.

Sonradan X.İsmayılova Facebook-da yerlşdirilən hansısa yazılardan istifadə edib və orada həmin adları göstərib. Bu, MTN-in arayışı olub və bildirilib ki, Elman Həsənov (Türkoğlu) MTN-in agentidir. Bu sənədi Facebook-da MTN-in keçmiş zabiti, Fransada siyasi sığınacaq alan Ramin Nağıyev yerləşdirib.

Bu gün E.Həsənov bildirib ki, Mustafa Kozlu adlı istifadəçi AXCP fəalı Natiq
Ədilov və “Azadlıq” qəzetinin redaktoru Qənimət Zahiddir. E.Məmmədov onları məhkəməyə verəcəyini bildirib.16/03B-