XİN mətbuat xidmətinin məlumatı

Azərbaycan XİN ölkənin Livandakı səfirliyindən aldığı məlumata əsasən bildirir ki, avqustun 25-də Livanın Beyrut şəhərində baş vermiş yol qəzası nəticəsində yolun piyadalar üçün nəzərdə tutulmayan hissəsində Azərbaycan vətəndaşı Xəzər Əliyevi (1994-cü ildə anadan olub) avtomobil vurub. X.Əliyev hadisəni törədən şəxsin iştirakı ilə təcili tibbi yardım xidməti vasitəsilə xəstəxanaya çatdırılıb. Ona ilkin yardım göstərilməsinə baxmayaraq, həmin gün vəfat edib. Mərhumun üzərində olan pasport əsasında Beyrut şəhər polisi Azərbaycan səfirliyi ilə əlaqə saxlayıb.

Səfirliyin konsulluq xidmətinin əməkdaşları xəstəxanaya gediblər. Polis və tibb işçiləri ilə birlikdə cəsədə baxış keçirilib və mərhumun şəxsiyyəti müəyyən edilib.

Səfirlik tərəfindən zəruri tədbirlər görülüb, mərhumun ailəsinə məlumat verilib və faktla bağlı cinayət işinin açılması təmin edilib.

X.Əliyev Livanda olduğu müddətdə səfirlikdə konsulluq qeydiyyatında olmayıb. Onun səyahət sığortasının da olmadığı bildirilir. Xəstəxana göstərilən tibbi xidmətin müqabilində ödəmə tələb edir.

Digər ölkələrdə olduğu kimi, büdcə təşkilatları olan Azərbaycan Respublikasının xaricdəki diplomatik nümayəndəliklərinin büdcəsində bu kimi hallar üçün vəsait nəzərdə tutulmayıb.

Azərbaycanın Livandakı səfirliyi Beyrut polisi, xəstəxana və hadisəni törədən şəxs və onun vəkili ilə əlaqə saxlayaraq cənazənin Azərbaycana göndərilməsinin təmin edilməsinə çalışır.

XİN-in Konsulluq İdarəsi məsələni diqqətdə saxlayır.