Yanğın zamanı həlak olanlar arasında beş uşaq var (YENİLƏNİB)

Dünən “Azadlıq” prospektindəki 16 mərtəbəli binada baş vermiş yanğın nəticəsində həlak olanların şəxsiyyəti  müəyyənləşdirilib. Səhiyyə Nazirliyi həlak olanların adlarını açıqlayıb:

Məhərrəmova Fərəh Elnur qızı (3 yaş);

Bağırov Sahib Rahib oğlu (49 yaş);

Bağırova Firəngiz Rahib qızı (60 yaş);

Şirinova Zülfiyyə Yavər qızı  (43 yaş);

Nəcəfzadə Yavər Yaşar oğlu (27 yaş);

Eyvazov Davud Qamir oğlu (16 yaş);

Eyvazova Ülkər Qamir qızı (21 yaş;

Cavadov Ömər Vüqar oğlu (1 yaş yarım);

Kərimova Nazilə Malik qızı (39 yaş);

Kərimova Ayan Anar qızı (5 yaş);

Hüseynov Ayxan Şahin oğlu (2 yaş);

Həsənova Alla Antonovna (58 yaş);

Utuşev Yuri Vladimiroviç (67 yaş);

Boykova Lyubov Viktorovna (87 yaş)

Yəhyayeva Elmira Əlağa qızı (68 yaş)

Bir ailədə üç nəfər həlak olub – Şirinova Zülfiyyə və övladları Davud və Ülkər.

Bundan əlavə bacı-qardaş Bağırov Sahib və Bağırova Firəngiz həlak olublar.–06D-

2015 May 20 (Çərşənbə) 12:28:37

“Azadlıq” prospektində yerləşən 16 mərtəbəli binada baş vermiş yanğın zamanı xəsarət alan daha bir nəfər dünən xəstəxanada vəfat edib. 68 yaşlı Elmira Yəhyayeva 1 saylı Kliniki Tibbi Mərkəzin toksikologiya şöbəsində vəfat edib. Bu barədə Səhiyyə Nazirliyi məlumat yayıb. Beləliklə, ölənlərin sayı 15 nəfərə çatıb.

Xəstəxanalarda 12 nəfər var. Onların vəziyyəti “stabil” kimi qiymətləndirilir.

Eyni zamanda evləri yanan sakinlərin müvəqqəti mənzillə təmin olunması üçün tədbirlər görülür.

Yanğının səbəblərinin araşdırılması və nəticələrinin aradan qaldırılması üzrə Dövlət Komissiyasının birinci iclasında qurumun sədri Abid Şərifov bildirib ki, evləri yanan sakinlərin müvəqqəti yerləşməsi üçün 56 obyekt ayrılıb.

Öz növbəsində əmək və əhalinin sosial müdafiəsi naziri Səlim Müslümov jurnalistlərə bildirib ki, həmin şəxslərə Dövlət Sərhəd Xidmətinin pansionatında 10 kotec, Bilgəh qəsəbəsində Əmək və Əhalinin Sosial Müdafiəsi Nazirliyinin sanatoriyasında 60 otaq, həmçinin Buzovna qəsəbəsində Həmkarlar İttifaqları Konfederasiyasının pansionatı ayrılıb.

Sakinlər mənzilləri bərpa olunana qədər orada yaşadıqları müddətdə yemək və geyimlə təmin olunacaqlar.

Bu gün səhər prezident İlham Əliyev yanğının baş verdiyi yerə gedib.

Dünəndən Bakıda binalardan tez alışan üzlüklərin sökülməsinə başlanılıb. Əsasən Sabunçu rayonu Bakıxanov qəsəbəsində, Xətai və Binəqədi rayonlarında evlərdən penoplast üzlüklər sökülüb.

Lakin cavabsız suallar qalır - Global Constuction şirkətinin binaları bu cür üzləməsinə görə kim məsuliyyət daşıyır? Bu binalar “ölüm örtüyü”nə bürüdülərkən FHN, Dövlət Standartlaşdırma  Komitəsi, Bakı Şəhər İcra Hakimiyyəti hara baxırdılar?—06D--