“Zaminbank” ASC-nin keçmiş rəhbəri həbs edilib

Bakı/07.07.20/Turan: Baş prokuror yanında Korrupsiyaya Qarşı Mübarizə Baş İdarəsi “Zaminbank” ASC-nin keçmiş rəhbərliyi tərəfindən özgə əmlakının mənimsənilməsi faktlarını araşdırıb.

İstintaq müəyyən edib ki, Nadir İsmayılovun “Zaminbank” ASC  Müşahidə Şurasının sədri vəzifəsində çalışdığı dövrdə bankın 16 mln. manat məbləğində vəsaiti mənimsənilib.

Bundan əlavə, N.İsmayılov qəsdən sənədləri saxtalaşdırıb və bankın Bakı filialının müdiri Elşən Şirinova məxsus 145 min manat məbləğində vəsaiti mənimsəyib.

N.İsmayılova qarşı CM-in 308.2 (ağır nəticələrə səbəb olan vəzifə səlahiyyətlərindən sui-istifadə), 179.3.2 (külli miqdarda mənimsəmə), 178.3.2 (külli miqdarda ziyan vurmaqla dələduzluq) və 320.2-ci (bilə-bilə saxta sənədlərdən istifadə etmə) maddələri ilə ittiham irəli sürülüb. O 4 ay müddətinə həbs edilib.

Dövlətə və vətəndaşlara vurulan ziyanın ödənilməsini təmin etmək məqsədilə N. İsmayılova məxsus əmlakların aşkar edilməsi və onun cinayətkar əməllərinə bağlılıqda şübhəli olanların  dairəsinin müəyyən edilməsi üçün əməliyyat tədbirləri davam etdirilir.

Bundan öncə baş prokuror yanında Korrupsiyaya Qarşı Mübarizə Baş İdarəsi tərəfindən “Zaminbank” ASC-nin 11 vəzifəli şəxsinin barəsində 7cinayət işi araşdırılıb və 18 mln. manat məbləğində ziyanın ödənilməsi təmin edilib.

“Zaminbank” ASC-nin lisenziyası 2016-cı ilin iyulunda geri çağırılıb.–06D-