Zərdabi adına mükafatlar təqdim edilib

Azərbaycan Jurnalistlər İttifaqı (AJİ) bu gün ilk Azərbaycan qəzetinin banisi Həsən bəy Zərdabi adına mükafatın laureatlarının adlarını açıqlayıb. Mükafat ənənəvi olaraq 22 iyul – Milli Mətbuat Günü təqdim edilir.

Mükafatlandırılanlar arasında televiziya nümayəndələri də var.

“Milli mətbuat günü təkcə çap mətbuatına deyil, bütün jurnalistikaya aiddir. Özü də o, ilk dəfə 1991-ci ildə prezident fərmanı ilə Jurnalistika Günü kimi təsis edilib”, deyə AJİ sədri Elçin Şıxlinski bildirib.

Zərdabi mükafatının diplomları 8 media nümayəndəsinə təqdim edilib:

1. İbrahim Naiboğlu, publisist (müasir Azərbaycan mətbuatının inkişafına verdiyi töhfələrə görə),

2. Qənirə Ataşova, ANS TV (aktual mövzularda müsahibələrə və şərhlərə görə),

3. Səadət Məmmədova, YurdTV (“Sərt mövqe” televerilişinə görə),

4. İlqar Rüstəmov, “Xalq” qəzeti (ölkənin sosial-ictimai həyatına həsr olunmuş məqalələr silsiləsinə görə),

5. Rəşad Rüstəmov, “Zerkalo” qəzeti (jurnalist araşdırmalarına görə),

6. İnqilab Şirinov, Yevlax şəhərində EL TV (“168 saat” analitik proqramına görə),

7. Namiq Əhmədov, publisist (“Türk bayrağına baxaraq...” adlı Azərbaycan-Türkiyə münasibətləri haqqında kitaba görə),

8. Elnur Astanbəyli, “Azadlıq” qəzeti (publisistikaya görə).

“Xalq” qəzetinin akt zalında keçirilən diplomların təqdim edilməsi mərasimindən sonra Azərbaycan jurnalistikasının yarandığı gündən etibarən ötən 138 il ərzində onun vəziyyəti haqqında fikir mübadiləsi aparılıb. -0-