Zığ sakinləri etiraz aksiyası keçiriblər

Bakının Zığ qəsəbəsinin 1000 nəfərə yaxın sakini bu günlərdə etiraz aksiyası keçirib. Bu haqda Turan-a qəsəbə sakini Cavad Ağabalayev bildirib.

Onun sözlərinə görə, etiraz aksiyasının keçirilməsinə səbəb qəsəbəyə örüş yeri kimi ayrılmış 30 ha sahədə mənsubiyyəti bilinməyən təşkilatların tikinti işi aparmaq istəməsi olub. Kənd sakinləri  ərazidə toplaşandan sonra burada tikinti aparan fəhlələr texnikalarına qədər yığışdırıb ərazini tərk ediblər. C.Ağabalayevin sözlərinə görə, hadisə yerində olan qəsəbə icra nümayəndəsi sakinlərə burada tikinti aparılmasından xəbərsiz olduğunu deyib. Qəsəbə sakinləri isə məsələyə aydınlıq gətirilməsi üçün Suraxanı Rayon İcra Hakimiyyəti başçısı ilə görüşməyi də nəzərdə tuturlar.

“Kimin aparmasından asılı olmayaraq bu tikinti qanunsuzdur. Həmin 30 ha sahə qəsəbəyə örüş yeri kimi mərhum dövlət başçısı Heydər Əliyevin sərəncamı ilə hələ 1998-ci ildə ayrılıb, həmin sərəncamı qüvvədən salan yeni sərəncam yoxdur , ona görə də biz atdığımız addımda özümüzü haqlı bilirik”, C.Ağabalayev qeyd edib.

Buna qədər tikinti aparmaq məqsədilə ərazini hasarlayan şəxslərlə dəfələrlə söhbət etdiklərini, məsələni danışıqlar yolu ilə həll etmək istədiklərini deyən C.Ağabalayev həmin şəxslərin qəsəbə sakinlərinin dediklərini qulaqardına vurduqlarını çatdırıb. Bu adamlar o vaxt danışıqlara gələn qəsəbə sakinlərinə Zığa qəsəbə stasusu veridliyi üçün örüş yeri ayırlmasının “qanunsuz” olduğunu izah etmək istəyiblər. “Bizi belə dilemma ilə üz-üzə qoydu bu adamlar. Haqqımızı müdafiə etmək üçün kütləvi aksiyaya əl atmaq məcburiyyətində qaldıq, amma ümid eirəm ki, rayon icra başçısıilə dasnışıqlardan sonra məsələ tam aydınlaşa bilər”, - C.Ağabalyev mövqeyini çatdırıb.

C.Ağabalyev indinin özündə belə bu tikintini kimlərin aparmaq istədiyini bilmədiklərini söyləyib. Onun sözlərinə görə, bu məsələdə Nəqliyyat Nazirliyinin,  FHN-in, hətta deputat Mehriban Əliyevanın adını hallandırıblar. O bu adlara istinadları əsassız sayaraq bunu tikintini aparmaq istəyən şəxslərin sakinlərin müqavimətinin qarşısını ala bilmələri üçün uydurduqları qənaətini ifadə edib.

Xatırladaq ki, bu hadisəyə qədər Zığ qəsəbəsinin bir qrup sakini Beynəlxalq Mətbuat Mərkəzində mətbuat konfransı keçirərək qəsəbənin problemləri haqda danışıblar -05B-